"Boll u fshehe!" Deklarata e Ramës për "Xibrakën", Bardhi: Na trego çfarë bënte yt vëlla me makinën e grupit të kokainës

Gazment Bardhi dhe Edi Rama

TIRANA- Pas deklaratave të kryeministrit Edi Rama për dosjen "Xibraka", ka reagur sot kreu i grupit parlamentar të PD-së, Gazment Bardhi. Bardhi thotë se Rama, është i lumtur për rihapjen e dosjes “Xibraka”, po aq sa ishte Erion Veliaj kur doli pas 8 orëve nga SPAK. Ai thtotë se në mëngjes vëllai i vogël, Olsi Rama, ripërsërit të njëjtën kërkesë në SPAK që është rrëzuar më parë, me shpresën se do i jap oksigjen për gënjeshtrën ditore të darkës vëllait të madh, Edi Rama, që, sipas Bardhit, i ikën të vërtetës prej më shumë se 2 muaj.

Bardhi i drejtohet kryeministrit Rama në reagimin e tij duke i thënë se duhet të tregojë se çfarë bënte vëllai i tij me makinën që përdorte grupi i kokainës. Kreu i grupit parlamentar të PD-së, u denoncua dje për herë të dytë në SPAK nga vëllai i kryeministrit, Olsi Rama për dosjen Xibraka. 

Postimi i Bardhit:

Vëllai i madh i Olsit, Edi Rama, është i lumtur për rihapjen e dosjes “Xibraka”, po aq sa ishte Erion Veliaj kur doli pas 8 orëve nga SPAK! Përpjekja e tij e dëshpëruar për të diskretituar SPAK, duke e urdhëruar nga TV se çfarë duhet të bëjë dhe sesi duhet ta trajtojë këtë çështje, është tregues i formimit të tij prej analfabeti ligjor që mendon se institucionet e drejtësisë janë zyra propagande qeveritare.

Në mëngjes vëllai i vogël ripërsërit të njëjtën kërkesë në SPAK që është rrëzuar më parë, me shpresën se do i jap oksigjen për gënjeshtrën ditore të darkës vëllait të madh, që i ikën të vërtetës prej më shumë se 2 muaj. Boll u fshehe pas letrave pa vlerë të vëllait më të vogël! Na trego çfarë bënte yt vëlla me makinën që përdorte grupi i kokainës me targa AA 653 DM. Sado të përdridhesh nuk e fsheh dot të vërtetën dhe as makinën e kartelit të drogës me targë AA 653 DM, e përdorur nga Olsi Rama!

Deklarata e Ramës:

Ky zotnia, çingia është i kallëzuar për kallëzim të rremë. Janë dy aty në SPAK, është kjo është dhe kallëzimi për të për kallëzim të rremë. Unë jam i lumtur që gjeja tani është futur në rrugën e drejtësisë, e SPAK. SPAK të na thotë o unë kam një trafikant kokaine në familje, ose kjo goja e madhe B-së së vogël i duhet vënë proteza nga drejtësia. Një nga të dyja, nuk mund të ketë dhe kështu dhe ashtu. O njëri, o tjetri duhet të përgjigjet para drejtësisë.

gazment bardhi