Celibashi takim me ambasadorin e ri të Prezencës së OSBE: Mbeten vetëm 10 muaj kohë për votën e diasporës

Iljrian Celibashi

TIRANA- Kreu i Komisionit Qendror të Zgjedhjeve, Ilirjan Celibashi priti sot në takim ambasadorin e ri të Prezencës së OSBE në Tiranë, Michel Tarran. Mësohet se ata biseduan për mbështetjen e dhënë ndaj KQZ dhe rrugën në vijim teksa ambasadori Tarran theksoi se, ka trashëguar një raport të shkëlqyer bashkëpunimi me KQZ dhe se do të vijojë thellimin e bashkëpunimit dhe mbështetjes institucionale.

Po ashtu në takim u bisedua për projektet e përbashkëta të edukimit zgjedhor dhe trajnimit të administratës zgjedhore, me fokus krijimin e një strukture të përhershme të trajnimit, me qëllim rritjen e kapaciteteve të administratës zgjedhore në rrugën drejt depolitizimit të saj gradual.

“Në takim u diskutua me detaje mbi afatet e realizimit të reformës zgjedhore dhe votimit nga jashtë dhe ishim në të njëjtën frekuencë në lidhje me kohën për realizim, kohë e cila po shkurtohet ditë pas dite”, tha Celibashi.

Nga ana tjetër, Tarran nënvizoi se mbeten vetëm 10 muaj kohë për të nisur nga zero procesin e votimit të shqiptarëve jashtë vendit dhe se do të jetë tejet e vështirë për KQZ për t’u kryer, pasi votimi nga jashtë mbetet problematik nga pikëpamja teknike edhe për vende shumë më të zhvilluara se Shqipëria. Ai shtoi se forcat politike duhet të gjejnë marrëveshje sa më shpejt pasi procesi i përgatitjes së votimit nga jashtë kërkon kapacitete, kohë dhe shpenzime tejet të konsiderueshme.

kqz