Radhë e gjatë automjetesh është krijuar në pikën kufitare të Kakavijës, në krahun e palës greke.
Burime nga...
POLITIKE
Deputeti i Lëvizjes Bashkë: Do vazhdoj të luaj shah në Parlament!
PiranjatPërditësimi i fundit 4 Mars 2026, 19:32
Pas disa imazheve që dolën në media duke e nxjerrë në mes të lojës së shahut në seancën e kuvendit, Redi Muçi reagoi në rrjetet sociale duke thënë se i premton solemnisht elektoratit se do të vazhdojë të luajë shah, sa herë seancat të bëhen të mërzitshme.
Është e vërtetë që seancat në Kuvendin e Shqipërisë ndonjëherë bëhen të gjata dhe të lodhshme por tek e fundit kjo është puna e deputetit, të dëgjojë edhe kur nuk i pëlqen kolegu që flet, të ndjekë seancën plenare apo punimet e komisioneve edhe kur ato shkojnë përtej orareve të zgjatura.
Deputeti për këtë paguhet.
Nëse Redi Muçi mendon se është intelektualisht superior ndaj kolegëve të tij dhe duke nxjerrë një mace në një video shtëpie ka për të treguar spontantitet dhe shpërfillje, gabohet në interpretimin e punës së tij.
Edhe rrëshqitjet e dherave, edhe prona e Rrjollit apo e Durrësit, edhe problematikat në spitale apo politika e jashtme, marrin zanafillë në parlament. Ky parlament si organi më i lartë përfaqësues dhe ligjvënës mund t’i japë platformën Redi Muçit të mbajë fjalime epike ashtu si mund t’u mundësojë deputetëve të tjerë të shprehen sipas botëkuptimit apo linjës politike.
Snobizmi nuk mund të jetë kurrë qasja në Kuvendin e Shqipërisë, aq më pak nga një parti që pretendon të përfaqësojë të majtën e vërtetë, njerëzit e thjeshtë e të punës.
Për ta mbyllur me seriozitetin e duhur, i propozojmë deputetit Muçi që të organizojë një ndeshje shahu live në Kuvend me kolegun Eduard Shalsi. Nëse arrin të fitojë ndaj tij pse jo edhe një simultane me të gjithë ministrat, përfshirë Kryeministrin.
Ndoshta ky do ishte shah mati përfundimtar për të bërë revolucionin e madh.
