Një tjetër grup studentësh, ata të Mjekësisë, i janë bashkuar turmës së protestuesve të mbledhur para Kryemini...
POLITIKE
"Çdo tango me Kujtim Gjuzin na krijon lëkundje të përgjithshme", Rama: Na duhet BE sot për të marrë fuqi të re financiare, ja çfarë na siguron integrimi
r.llPërditësimi i fundit 6 Mars 2025, 18:05
edi rama
TIRANË- Kryeministri Edi Rama ka marrë pjesë ditën e sotme në një takim me të rinjtë e Partisë Socialiste. Rama ka folur lidhur me integrimin e vendit në Bashkimin Europian dhe benefitet që sjell anëtarësimi për Shqipërinë.
Ai u shpreh se akoma nuk ka ardhur koha që raporti me BE të jetë i pavarur nga kush e qeveris Shqipërinë, ndërsa shtoi se kjo vjen kur vendi të bëhet anëtare e unionit. Në fjalën e tij nuk kanë munguar ironitë për koalicionin opozitar, ku tha se "çdo tango me Kujtim Gjuzin na krijon lëkundje të përgjithshme".
Më tej, Rama tha se Shqipërisë i duhet sot Bashkimi Europian për të marrë fuqi të re financiare, përveç të gjithë të mirave të tjera që do të përfitohen. Ai shtoi se ajo që na garanton BE është se liria individuale dhe barazia para ligjit do të jetë e njëjtë me çdo qytetar evropian.
"Gjithë përpjekja që po bën sot BE dhe që unë jam i bindur më herët se vonë do jetë përpjekje e gjithë kontinentit tonë, flas për vendet demokratike që do mblidhen në Tiranë më 16 maj është një qasje komplet e re ndaj sigurisë, ndaj mbrojtjes dhe ndaj sensit të përbashkët të sigurisë. Kjo është diçka e re, është diçka urgjente e kohës dhe këtu na duhet lidership, na duhet qëndrueshmëri, stabilitet i plotë në këtë marrëdhënie. Nuk ka ardhur akoma kohë që raporti ynë me BE të jetë i pavarur nga kush qeverisë në Shqipëri. Ajo kohë vjen në momentin kur ne bëhemi anëtar. Për aq kohë sa nuk jemi anëtarë është e rëndësishme se kush qeveris në Shqipëri. Është bërë një investim i madh në këto vite që ne të kemi këtë partneritet, këtë respekt reciprok dhe të kemi këtë besim tek Shqipëria.
Cdo lloj lëkundje dhe cdo tango me Kujtim Gjuzin do krijonte një lëkundje të përgjithshme. Kujtim Gjuzi është lulja më e bukur në atë buqetë. Më besoni. Është ku ma gjen. Tjetra që ka shumë rëndësi është se na duhet BE sot për të marrë fuqi të re financiare, përveç të gjithë të mirave tjera. Kur të hyjmë në BE ne bëhemi vend përfitues, dhe kemi një buxhet ekstra për çfarë na duhet. BE ndryshon komplet lojën. Është ngritje morale jo vetëm në aspektin të qenët të barabartë me vulë njësoj. Pasaporta me vulen BE do t'ju japë të njëjtat vlera dhe të drejta me qytetarët gjermane dhe italiane. Në BE Shqipëria bëhet si Pogradeci dhe Kroacia si Korça, Sllovenia si Vlora, Austria si Tirana.
Prapë jemi një vend me të njëjtat rregulla dhe aksese por me institucione të veçanta të vetqeverisjes së brendshme. Kjo garanton dhe pakthyeshmërinë mbrapa, aty ku ishim. Ne në Europë ishim dhe kur kishim diktaturën. Dhe kur ne dhe Europa ishim në tjera ujëra. Ajo që na garanton BE është se liria individuale dhe barazia para ligjit, nuk mund tju cënohet. E drejta për punë është e garantuar. BE është projekti më i jashtëzakonshëm i njerëzimit. Në një botë ku Europa nuk është më fuqia që ishte në peshën në ekonominë botërore, BE është përgjigja. 11 maj është vazhdimësia e të gjithë gjerave tjera.", tha Rama.
