"Do vendosim arsimtarin në piedestal!", Berisha: Rrogat e mësuesve do shkojnë drejt dyfishimit

sali berisha

TIRANË- Kryetari i PD-së, Sali Berisha tha se me ardhjen e tyre në qeveri do të vendosin arsimtarin në piedestalin që ai meriton në mënyrë që ai të përmbushë misionin e tij.

Berisha tha se në këtë kontekst do të shkojnë drejt vendimit për dyshimin e rrogave të mësuesve. Ai u shpreh se gjithashtu do të bëhet modernizimi i plotë i infrastrukturës shkollore. Lidhur me punësimin e të rinjve, Berisha tha se do të ketë grante dhe kredi të buta për çdo biznes të tyre. Gjithashtu u shpreh se do të ketë kredi të buta për çdo çift të ri. 

"Së pari, arsimtari. Ne do vendosim arsimtarin në piedestalin që ai meriton në mënyrë që ai të përmbushë misionin e tij. Arsimtari është misionar, në këtë kontekst ne do shkojmë drejt dyfishimit të rrogave të mësuesit. Drejt modernizimit të sistemit shkollor me teknologjitë më të larta. Dixhitalizimit të plotë të tij. Drejt standardeve që bëjnë që mësuesit të kenë nivelin përkatës arsimor dhe ata që janë larguar për arsye politike apo arsye të tjera, të rikthehen.

Drejt modernizimit të plotë të infrastrukturës shkollore. Zonjë, ju mund t’i referoheni fakteve. Në vitet 2006-2013, në testin e PISA-s, cilësia në arsimin shqiptar pati rritje vertikale. Në vitet 2015-2023, në testin e PISA-s, cilësia e arsimit pati rënie katastrofale, rënien më të madhe në botë. Kjo gjendje do ndryshojë me shpejtësi, por gjykoj se para së gjithash do fillojë nga mësuesi. Natyrisht infrastruktura do bëjë që të mos ketë më shkolla me turne. Të mos ketë klasa me 40 nxënës dhe shumë ndërhyrje të tjera.

Sa u përket punësimit të të rinjve, do ketë incentiva dhe stimuj fiskal për çdo të ri të punësuar. Do ketë grante dhe kredi të buta për çdo biznes të tyre. Do ketë kredi të buta për çdo çift të ri për të filluar jetën e tyre. Pra, do ketë një përkrahje direkte të veçante për të rinjtë.", tha Berisha.

sali berisha