Dosja 'Partizani'/ Argita Malltezi: Kjo është një dosje pa çështje. SPAK ka ngritur një akuzë duke falsifikuar dokumente

Argita Malltezi

TIRANË- Vajza e ish-kryeministrit Sali Berisha, Argita Malltezi ka folur në lidhje me përjetimet e saj nga arrestimet e Berishës dhe të Jamarbër Malltezi. E ftuar në emisionin “Ora e Betit” në “Ora Neës” ,Malltezi theksoi se dosja Partizani nuk ka asnjë çështje në vetëvete. 

“Në aspektin personal njeriu e ka të pamundur të zgjedhë një jetë të rrafshët dhe pa sfida. Por shumë shpesh gjatë kësaj periudhe, nëse të bien sfida, je me fat nëse mundesh t’u japësh fëmijëve një model. Se me kalimin e kohës ata arrijnë të formojnë fizionominë e tyre, je me fat nëse mundesh t’u japësh atyre një model se si përballohen sfidat është një arritje shumë e madhe. Përpiqemi të krijojmë normalitet mes nesh me aq sa mundemi. I mungojnë shumë takimet me njerëzit dhe shtrëngimi i duarve me ta. Edhe pse takimi i përnatshëm me ta në tubimet është disi lehtësues”, tha Malltezi.

Po ashtu Malltezi theksoi se për ta bërë këtë dosje SPAK ka falsifikuar dokumente dhe ka shtrënguar fakte.

"Kjo është një dosje pa çështje. Nuk ka asnjë shkelje të asnjë dispozite, dhe këtë ata nuk e kanë treguar në çfarë forme dhe kush është dispozita e shkelur që ia atribuojnë Sali Berishës. Për të bërë këtë dosje, SPAK ka falsifikuar dokumente, ka shtrënguar fakte dhe këtë e ka bërë jo vetëm kur gjykata vendosi në 2023, por në çdo raportim dymujor që bëhet në atë çështje," tha Malltezi.

argita malltezi