Ish-zëvendëskryeministrja Belinda Balluku është paraqitur këtë të martë në ambientet e Prokurorisë s...
INVESTIGIME
E afërt me Isain/ Me kë i vidhte tenderat e Bashkisë Kolonjë Erioni?
PiranjatPërditësimi i fundit 25 Shtator 2025, 12:44
Detaje të reja kanë dalë në dritë nga dosja e kryebashkiakut socialist të Kolonjës, Erion Isai, i cili u mor i pandehur nga Prokuroria e Posaçme të martën 23 shtatorit. SPAK po e heton Isain për 4 tenderë abuziv, duke shpërdoruar detyrën.
Dy prej tyre janë mbi një kallëzim të avokatit, Esmerald Xhafa dhe një tjetër për rehabilitimin e një rrjeti ujësjellësi. Sipas organit hetues personi kyç në prokurorimet publike në Bashkinë e Kolonjës është Entela Çano.
Kjo e fundit me dyshime se duke pasur lidhje të afërta me kryebashkiakun Erion Isai ka përfituar tendera. Sipas hetimeve të drejtuara nga prokurori Dritan Prençi, Çano kishte fituar një tender publik e po ashtu ka fituar edhe të drejtën e mbikëqyrjes së punimeve, që dukshëm është në konflikt interesi.
A&E ENGINEERING, kompania që “mbikëqyri” pa garë ujësjellësin në Kolonjë dhe përfundoi në SPAK
Piranjat.al kanë shfletuar dokumentet e tenderave nga ku rezulton se A&E ENGINEERING sh.p.k. është kompania që në vitin 2021 mori përsipër shërbimin e mbikëqyrjes së punimeve për tenderin “Shërbim Mbikëqyrje Punimesh për objektin: Ndërtimi i rrjetit të ujësjellësit në fshatrat e thellë të Kolonjës (Taç Qendër, Taç Poshtë, Kabash, Kodras, Gjonç, Prodan, Shelegur, Vërçkë, Radanj, Radat, Kolanj, Priftas, Barmash, Mesare, Sanjollas, Blush dhe Boshanj)”.
Kontrata, e tipit shërbim publik, kishte një kohëzgjatje deri në 12 muaj dhe për mbikëqyrjen e saj ishin planifikuar 29 milionë lekë nga buxheti i shtetit. Tenderi u shënua me “flamur të kuq”, pasi nuk pati garë – i vetmi operator që hyri në lojë ishte pikërisht A&E ENGINEERING sh.p.k.
Administratorja dhe aksionerja e kompanisë është Entela Çano, e cila duhej të garantonte cilësinë e punimeve. Por mbikëqyrja rezultoi shumë larg standardeve, duke u shoqëruar me shkelje që nuk u panë ose u injoruan.
Nga ujësjellësi në Kolonjë te shembja e rrugës Korçë–Ersekë
Emri i kësaj kompanie është rikthyer në qendër të vëmendjes në vitin 2024, kur A&E ENGINEERING dhe A.N.K sh.p.k. u kallëzuan në SPAK pas shembjes së një pjese të rrugës së re Korçë–Ersekë, ende pa u inauguruar.
Pamjet e publikuara në media tregonin se një nga nyjet kryesore të aksit ishte kthyer në një gropë gjigante. Kompania A.N.K sh.p.k., në pronësi të Agim Kolës – vëllai i ish-deputetit socialist Ndue Kola – dhe kompania A&E ENGINEERING sh.p.k., në pronësi të inxhinieres Entela Çano, janë kallëzuar për mënyrën se si u procedua në këtë projekt. Avokati korçar Esmerald Xhafa ka depozituar kallëzim penal në SPAK, duke kërkuar hetim për veprat penale:
Shpërdorimi i detyrës
Falsifikim i dokumenteve
Korrupsion i personave që ushtrojnë funksione publike
Ky rast ngre sërish pikëpyetje mbi praktikën e mbikëqyrjes së punimeve publike dhe mbi mënyrën se si tenderët e shpallur “pa garë” përfundojnë duke u kthyer në skandale me pasoja të mëdha financiare dhe infrastrukturë që shembet pa u përdorur./piranjat.al
