Në fund të vitit 2025, numri i mjeteve rrugore të regjistruara (me status aktiv ose të çregjistruara përkohësisht) arriti n...
POLITIKE
"E paprecedentë"/ Tabaku: Reforma në drejtësi, e la vendin për tri vjet pa Gjykatë Kushtetuese
PiranjatPërditësimi i fundit 21 Tetor 2025, 11:44
Deputetja e Partisë Demokratike dhe Kryetarja e Komisionit të Medias dhe të Drejtave të Njeriut, Jorida Tabaku, mori pjesë në konferencën ndërkombëtare të organizuar me rastin e 30-vjetorit të anëtarësimit të Shqipërisë në Këshillin e Europës dhe 35-vjetorit të themelimit të Komisionit të Venecias.
Gjatë panelit të dedikuar drejtësisë kushtetuese, Tabaku theksoi rëndësinë e ruajtjes së ekuilibrit ndërmjet vullnetit politik dhe kontrollit juridik, duke e cilësuar këtë si "shtyllën themelore të çdo demokracie moderne".
"Në çdo shtet modern, Kushtetuta është akti më i lartë juridik, dhe mbi këtë themel ngrihet një ekuilibër delikat midis vullnetit politik të shumicës dhe kontrollit juridik të Kushtetutës. Parlamenti është shprehja e sovranitetit të popullit, Gjykata Kushtetuese është garancia që ky sovranitet të ushtrohet brenda kufijve të ligjit dhe të drejtës."
Tabaku falënderoi Komisionin e Venecias për mbështetjen e vazhdueshme ndaj demokracisë shqiptare dhe ekuilibrave institucionalë, duke e quajtur "partnerin më të çmuar të demokracisë shqiptare".
Në fjalën e saj, deputetja opozitare vuri në dukje pasojat që solli mungesa për tre vite e Gjykatës Kushtetuese në vend, të cilën e cilësoi si një periudhë krize për demokracinë kushtetuese në Shqipëri.
"Reforma në drejtësi, megjithëse u nis me qëllime të mira dhe me kontribut të rëndësishëm nga Partia Demokratike, e la vendin për tri vjet pa Gjykatë Kushtetuese. Në atë kohë, Shqipëria ishte një shtet pa arbitër kushtetues. Çdo nismë që prekte balancat e pushtetit mbeti pa testin e kushtetutshmërisë. Dhe siç duket, maxhoranca u mësua pa të."
Ajo kujtoi gjithashtu se Komisioni i Venecias e kishte cilësuar këtë situatë si "të paprecedentë në historinë e drejtësisë kushtetuese", duke theksuar se vakumi institucional ka dëmtuar jo vetëm rendin e brendshëm demokratik, por edhe procesin e integrimit europian të Shqipërisë.
