Një veshkë derri e modifikuar gjenetikisht ka mbajtur gjallë dhe pa dializë një 66-vjeçar për plot nëntë muaj, p&...
POLITIKE
"Erdhi me helikopter të bindte palët të votonin pro Gjykatës Speciale"/ Kurti nuk ia përton Ramës dy fjalë për protestën e UÇK-së në Tiranë: Duhet të tregojë pendesë
PiranjatPërditësimi i fundit 16 Tetor 2025, 08:24
Kryeministri i Kosovës, Albin Kurti, ka reaguar ndaj protestës së thirrur në Tiranë për lirimin e liderëve të UÇK-së, duke thumbuar kreun e qeverisë shqiptare, Edi Rama. Në një postim në rrjetet sociale, Kurti ka theksuar se Lëvizja VETËVENDOSJE! mbështet qytetarët që kërkojnë drejtësi për ish-krerët e Ushtrisë Çlirimtare të Kosovës, ndërsa qëndrimi i saj për Gjykatën Speciale mbetet i pandryshuar.
Kurti ka kujtuar se themelimi i Gjykatës Speciale ka nisur që në vitin 2008, me një rezolutë të propozuar nga Rusia dhe miratuar më vonë nga Këshilli i Evropës. Ai thotë se Lufta e UÇK-së ka qenë e drejtë dhe e domosdoshme dhe ka refuzuar pretendimet e Prokurorisë se brenda UÇK-së ka pasur një grup kriminal, duke e cilësuar atë si të pasaktë dhe të padrejtë.
Për Kurtin, për të ecur përpara si shtet dhe komb, është e nevojshme që të reflektohet mbi qëndrimet e kaluara, duke theksuar se shumë nga ata që tani janë kundër Gjykatës Speciale, ishin lobuesit më të mëdhenj për themelimin e saj. Kryeministri shqiptar, Edi Rama, është një shembull i tillë, për të cilin Kurti kujton se kishte ardhur në Kosovë me helikopter për të bindur palët që të votonin pro themelimit të kësaj Gjykate.
Kurti tregon se Lëvizja VETËVENDOSJE! ka qëndruar e palëkundur në mbështetje të drejtësisë dhe të vërtetës, që, sipas tij, është gjithmonë në anën e luftës dhe përpjekjes së popullit të Kosovës për çlirim e pavarësi. Ai gjithashtu ka apeluar që institucionet e Shqipërisë dhe shtetet mike të Kosovës të angazhohen më shumë në forumet ndërkombëtare për të mbrojtur të vërtetën dhe për të çuar përpara drejtësinë në lidhje me krimet e luftës të kryera nga Serbia.
Lëvizja VETËVENDOSJE! qëndron në krah të të gjithë qytetarëve që protestojnë e kërkojnë drejtësi për ish-krerët e Ushtrisë Çlirimtare të Kosovës në Tiranë. Qëndrimi ynë për Gjykatën Speciale mbetet i pandryshuar.
Kujtojmë se Gjykata Speciale nuk erdhi vetvetiu, por nisi që në vitin 2008 nga një rezolutë e propozuar në Këshillin e Evropës nga kryesuesi i deputetëve të Federatës Ruse në Asamblenë Parlamentare të Këshillit të Evropës, Konstantin Kosachev, por që u miratua si rezolutë me propozim të senatorit Dick Marty në vitin 2011.
Lufta e Ushtrisë Çlirimtare të Kosovës ka qenë e drejtë dhe e domosdoshme. Në anën tjetër, pretendimi i Prokurorisë se brenda UÇK-së ka ekzistuar një grup kriminal është i pasaktë dhe i padrejtë. UÇK-ja nuk ka qenë ndërmarrje kriminale dhe nuk ka pasur struktura të tilla. Përkundrazi, për krime të luftës duhet të gjykohet Serbia, ajo është shkaktarja e gjenocidit dhe krimeve masive e sistematike ndaj popullit të Kosovës.
Mirëpo, për ecjen tonë të sinqertë përpara si shtet e si komb duhet me patjetër të reflektojmë mbi qëndrimet tona karshi kësaj Gjykate në kohën kur u themelua. Reflektimi nuk është gabim, por në këtë drejtim shumë nga ata që sot dalin në kundërshtim me Gjykatën Speciale, dje ishin lobuesit më të mëdhenj për themelimin e saj. Para se të protestojnë, këta aktorë dhe politikanë duhet të tregojnë të paktën një minimum pendese për qëndrimet e tyre të gabuara në të kaluarën. Një shembull i qartë është vet Kryeministri aktual i Shqipërisë, Edi Rama, i cili madje kishte ardhur në Kosovë në vizitë emergjente me helikopter për të bindur palët këtu që të votonin pro themelimit të kësaj Gjykate.
Por, Lëvizja VETËVENDOSJE!, si atëherë më 2015, si sot më 2025, është e palëkundur se drejtësia duhet të ndriçojë të vërtetën dhe e vërteta nuk ka si të jetë ndryshe veçse në anën e luftës dhe përpjekjes së paepur të popullit të Kosovës për çlirim e pavarësi sikur popujt e tjerë.
Në anën tjetër, institucionet e Shqipërisë si shtet anëtar i OKB-së, i Këshillit të Evropës, i OSBE-së, i NATO-s e shumë pranë Bashkimit Evropian, kanë përgjegjësi dhe mundësi që këtë çështje ta ngrejnë në këto forume ndërkombëtare, aty ku flitet e vendoset për drejtësi, e jo në sheshin “Skënderbe” në Tiranë.
Po ashtu shtetet mike të Kosovës që tashmë gëzojnë anëtarësi në këto organizata, duhet të bëjnë shumë më tepër për të mbrojtur të vërtetën e luftës sonë dhe për të çuar përpara drejtësinë. Njëjtë siç duhet bërë më shumë në këto forume për njohjen e gjenocidit dhe gjykimin e krimeve kundër njerëzimit, krimeve të luftës që Serbia i ka kryer në Kosovë e në mbarë Ballkanin.
