"Erdogan shkoi me dhurata në Tiranë!" Mediat greke: Presidenti turk kërkon të forcojë lidhjet në një rajon të sunduar dikur nga Perandoria Osmane

TIRANA- Mediat greke i kanë kushtuar disa artikuj vizitës së Presidentit turk, Rexhep Taip Erdogan në Tiranë. Në shkrimet e tyre, ato janë ndalur kryesisht te dronët kamikazë që Ankaraja do të dhurojë për Tiranën dhe hapja e xhamisë së Namazgjasë.

Televizioni "SKAI"  thekson se turi i tij në Shqipëri dhe Serbi ka për qëllim forcimin e marrëdhënieve ekonomike me këtë rajon.

“Ta Nea” shkruan se “Erdogan shkoi me “dhurata” në Tiranë dhe citon kryeministrin shqiptar Edi Rama që lavdëroi miqësinë me Erdogan duke u shprehur se “kjo është një dhuratë që vjen si një mesazh i fortë nga Republika e Turqisë se Shqipëria është e paprekshme”.“Megjithatë, ai sqaroi se marrja e dronëve kamikaze turq nuk do të thotë se Shqipëria do të sulmojë ndokënd”, shkruan media greke teksa ndalet edhe tek inaugurimi i xhamisë së Namazgjasë duke theksuar se edhe ky ishte një financim turk. 

“Kathimerini”  shkruan se "xhamia, ndërtimi i së cilës filloi në vitin 2015, karakterizohet si më e madhja në Ballkan”.

CNN Greece citon Erdogan, sipas së cilit, Ankaraja është ndër 5 investitorët e huaj më të mëdhenj në Shqipëri, me investime që arrijnë në 3.5 miliardë dollarë.

“Huffington Post” shkruan se Erdogan do të udhëtojë në Shqipëri dhe Serbi, në një turne ballkanik ku “ai kërkon të forcojë lidhjet në një rajon të sunduar dikur nga Perandoria Osmane”. 

“Erdogan sulmoi Izraelin për luftën në Gaza dhe Liban, duke e akuzuar atë për kryerjen të “gjenocidit”, duke bërë thirrje për një armëpushim të menjëhershëm dhe ndihmë humanitare. Edhe Edi Rama ra dakord për nevojën e armëpushimit, por retorika e tij në lidhje me Hamasin ishte e ndryshme nga ajo e presidentit turk, duke e quajtur atë një organizatë terroriste”, shkruan "Huffington Post".

“Euronews” në Greqi vë theksin marrjen e dromëve kamikazë nga Tirana dhe hapjen e xhamisë së Namazgjasë.

“Presidenti turk i kujtoi palës shqiptare çështjen e një lufte të përbashkët kundër terrorizmit, për praninë në Shqipëri të ndjekësve kryesorë të predikuesit Fethullah Gylen (FETO), të cilin Turqia e akuzon si organizatorin e grushtit të shtetit të vitit 2016”, shkruan kjo media.

erdogan