Sindikata e Punonjësve të Universiteteve të Shqipërisë (SPUSH) i është bashkuar reagimeve ndaj dhunës policore ndaj st...
POLITIKE
"Fidel, të lus të ruash faturat se kështu si ka ardhur koha...", Veliaj ankohet për SPAK në sy të Ramës
r.llPërditësimi i fundit 9 Janar 2025, 20:16
erion veliaj, edi rama
TIRANË- Komiteti Olimpik Kombëtar Shqiptar ka zhvilluar sonte mbrëmjen ceremoniale për sportistët shqiptarë në arenën ndërkombëtare për vitin 2024. I pranishëm në këtë organizim ishte edhe kryeministri Edi Rama dhe Erion Veliaj, kryetari i bashkisë së Tiranës, e cila është sponsori kryesor i ceremonisë.
Gjatë fjalimit të tij kryebashkiaku Veliaj nuk ka humbur rastin "të ankohet" edhe mbi hetimet e nisura nga Prokuroria e Posaçme ndaj tij. Duke ironizuar këto hetime, Veliaj iu drejtuar presidentit të KOKSH-së, Fidel Yllit duke i thënë të ruaj faturat se kështu si ka ardhur koha, po jua kërkojnë dhe duhet të jenë korrektë. Batutën e tij, kryebashkiaku e tha duke iu drejtuar Fidel Yllit, i cili ishte në të njëjtën tavolinë me Ramën.
"Fidel është gjithmonë një kënaqësi që ne të mbështesim Komitetin Olimpik Shqiptar, përfshirë edhe këtë festë. Të lus shumë që të mbash faturat. Kanë ardhur ditë që duhet të jemi shumë korrektë me gjërat dhe të kemi raportim të saktë të mbrëmjes gala. Përtej humorit i jemi përgjigjur pozitivisht thirrjes së kryeministrit për të qenë një bashki avangard, një nga bashkitë që shpenzon më shumë për sportin në Europë dhe rajon, dhe nuk kishim një mënyrë më të mirë për ta filluar këtë vit.", tha Veliaj ndër të tjera gjatë fjalimit të tij.
Kryebashkiaku i Tiranës, Erion Veliaj, është paraqitur në ambientet e Prokurorisë së Posaçme disa ditë më parë ku është marrë në pyetje për disa vepra penale. Veliaj, i shoqëruar nga drejtori juridik i bashkisë së Tiranës, Alban Dokushi ka qëndruar në ambientet e SPAK për më shumë se 5 orë. Mëngjesin e 6 dhjetorit me urdhër të Gjykatës së Posaçme kundër Korrupsionit dhe Krimit të Organizuar, oficerët e policisë gjyqësore ushtruan kontrolle në zyrat e kompanisë së bashkëshortes së kryebashkiakut të Tiranës Erion Veliaj, ndërsa më parë i kishin sekuestruar dhe telefonin celular. Kontrolle u ushtruan dhe në banesën e vëllait të Veliajt. Vetë Prokuroria e Posaçme nuk dha detaje, por u mjaftua të shpjegojë se ka kryer disa "veprime hetimore në kuadër të një procedimi penal". Ndaj Veliajt ka nisur një hetim pasuror, ndërsa po shihet dhe roli i tij në rastin e inceneratorit të Tiranës si dhe në çështjen e kompanisë "5D", që zotërohej nga ish-drejtorë të Bashkisë.
