Situata e zjarreve në vend vijon të jetë problematike, me 27 vatra të raportuara gjatë 24 orëve të fundit.
Tre vatra mbete...
POLITIKE
Gjykata Themelore në Prishtinë urdhëron Kurtin të dëshmojë në Prokurori më 4 mars
M.B.Përditësimi i fundit 28 Shkurt 2025, 18:05
KOSOVA- Gjykata Themelore në Prishtinë ka urdhëruar kryeministrin e Kosovës Albin Kurtin se duhet të paraqitet për të dhënë dëshmi në Prokurorinë Speciale, më 4 mars 2025. Zëdhënësja e Gjykatës Themelore, Mirlinda Gashi, ka konfirmuar se gjyqtari i procedurës paraprake ka lëshuar urdhrin për të dëshmuar, duke u bazuar në kërkesën e Prokurorisë Speciale.
“Ju njoftojmë se Gjykata Themelore në Prishtinë – Departamenti Special, me kërkesë të Prokurorisë Speciale të Republikës së Kosovës, me Urdhër të gjykatës të datës 21.02.2025 ka obliguar dëshmitarin A.K., që të paraqitet në cilësi të dëshmitarit, për të dhënë dëshminë e tij me datë 04.03.2025 në ora 10:00, në Prokurorinë Speciale të Republikës së Kosovës. Gjykata Themelore në Prishtinë – Departamenti Special me datë 28.02.2025, përmes emalit ka pranuar përgjigjen e Zyrës së Kryeministrit, lidhur me Urdhrin e lartë-theksuar të gjykatës”, ka thënë Gashi.
Më herët u bë me dije se zyra e Kurtit i është drejtuar përmes një letre Gjykatës Themelore në Prishtinë, duke kërkuar që ta detyrojë Prokurorinë Speciale që të marrë dëshminë e tij brenda zyrës së tij në qeveri. Në dhjetorin e vitit 2024, Prokuroria Speciale e Kosovës e ftoi Kurtin të paraqitet në cilësinë e dëshmitarit në një rast të hapur lidhur me dyshimet për keqpërdorime me rezervat shtetërore. Kurti refuzoi të paraqitej në Prokurori, duke u bërë thirrje prokurorëve që të shkojnë ata dhe ta intervistojnë në zyrën e tij, në Kryeministri.
Ftesën e parë Kurti e mori më 16 dhjetor, kur zëdhënësi i Qeverisë, Përparim Kryeziu, tha se Kurti nuk ishte paraqitur pasi që ishte në udhëtim jashtë vendit dhe kishte shtuar se Kurti “ka shprehur gatishmërinë t’i mirëpresë prokurorët e rastit në zyrën e tij në një ditë dhe orë të dakorduar nga të dyja palët për të përmbushur kërkesën e dalë nga ftesa e Prokurorisë”.
Katër ditë më vonë, Kurti mori sërish ftesë nga Prokuroria, të cilës prapë nuk iu përgjigj pozitivisht. Në Kodin e Procedurës Penale në Kosovë thuhet se një gjyqtar, sipas detyrës zyrtare, apo me kërkesë të Prokurorit të Shtetit, mund ta detyrojë një dëshmitar që të paraqitet. Nëse pas urdhrit gjyqësor, i ftuari nuk paraqitet në Prokurori, gjyqtari e dënon atë me gjobë prej 250 eurosh, sa herë që ai refuzon. Por, nëse ka refuzim edhe pas shqiptimit të gjobave, ai mund të burgoset, por jo më shumë se një muaj.
