"Hapja e qendrave të votimit, një makth i vërtetë"/ Celibashi: Qytetarët duhet të dalin të votojnë

TIRANË- Kreu i Komisionit Qendror të Zgjedhjeve, Ilirjan Celibashi, ka folur mbi atmosferën para zgjedhjeve të 11 majit, duke ndarë sfidat organizative, emocionet e stafit të KQZ-së në ditën e votimit dhe një thirrje të drejtpërdrejtë për qytetarët që të marrin pjesë në procesin zgjedhor. I ftuar në një intervistë për emisionin “Kjo Javë” në News24, Celibashi e përshkroi hapjen e qendrave të votimit si momentin më stresues për të dhe ekipin e tij.

KQZ, sipas tij, ka ngritur platforma të dedikuara komunikimi me komisionerët dhe monitoruesit për të marrë informacion në kohë reale dhe për të përballuar sfidat e minutës së fundit. Në mesazhin drejtuar votuesve, ai bëri një thirrje të qartë për pjesëmarrje. 

Celibashi: Hapja e qendrave të votimit është momenti më stresues për mua dhe stafin e KQZ. Ora 6 e mëngjesit deri nga ora 8 kur qartëzohen gjërat është një makth i vërtetë sepse vijnë raportime dhe mesazhe, jo po mungesa, jo po mungesa paraqitjeje, të krijohet ideja sikur po përgatitemi për luftë, por gjërat pastaj qartëzohen.

Unë qëndroj në zyrë në këto momente. Kemi disa platforma komunikimi me komisionerët në KZAZ dhe monitoruesit për të marrë informacion në kohë reale. Përmes tyre kemi synim të marrim informacion edhe një ditë para zgjedhjeve për të pasur një panoramë të qartë. Diku diku kemi ndonjë problem në lidhje me mungesën e energjisë elektrike, jo se mungon furnizimi, por ambienti ku zhvillohet votimi i mungon priza apo një element tjetër teknik. Kemi 4-5 raste të tilla.

Qytetarët duhet të dalin të votojnë, sepse vetëm kështu do përmbushin interesin e tyre për mënyrën se si duan të qeverisen. Do të duhet që të dalin në votime sepse vetëm kështu nesër kur të shohin qeverisjen e ardhshme do përmbushin interesin e tyre se cila duhet të jetë qeverisja që ata duan. KQZ ka përgatitur një proces zgjedhor që garanton fshehtësinë e votës. Shpresoj të jetë një përqindje më e lartë e votuesve dhe besoj se vota e diasporës do ketë impakt në këto zgjedhje.