Sindikata e Punonjësve të Universiteteve të Shqipërisë (SPUSH) i është bashkuar reagimeve ndaj dhunës policore ndaj st...
POLITIKE
"I kërkuam informacion Drejtorisë së Burgjeve..." SPAK i përgjigjet pretendimeve të Veliajt: Nuk është përdorur si rrethanë gjendja gjyqësore e tij për të caktuar masën shtrënguese
M.B.Përditësimi i fundit 14 Shkurt 2025, 16:03
TIRANA- Prokuroria e Posaçme ka bërë një sqarim për mediat ku thekson se, në kërkesën për caktimin e masës shtrënguese ndaj kryebashkiakut Erion Veliaj, asnjëherë nuk është përmendur statusi i tij si i dënuar.
SPAK shpjegon se në aktet e depozituara pranë Gjykatës së Posaçme, ka një certifikatë elektronike të gjendjes gjyqësore, e cila është gjeneruar nga Drejtoria e Përgjithshme e Burgjeve dhe që përmban informacionin se Veliaj është shënuar si i dënuar.
Sipas SPAK, Drejtoria e Përgjithshme e Burgjeve ka sqaruar se kur printohet vërtetimi i gjendjes gjyqësore, shfaqet automatikisht statusi i “dënuar”, pavarësisht se Veliaj ka 3 vendime pafajësie.
REAGIMI:
Në lidhje me pretendimet e shtetasit nën hetim E.V sa i takon gjendjes së tij gjyqësore, Prokuroria e Posaçme kundër Korrupsionit dhe Krimit të Organizuar sqaron se:
Në kërkesën për “Caktimin e masës shtrënguese të sigurimit personal”, drejtuar Gjykatës së Posaçme të Shkallës së Parë për Korrupsionin dhe Krimin e Organizuar për shtetasin nën hetim E.V, me numër protokolli 2402, datë 24.01.2025, Prokuroria e Posaçme nuk i është referuar për asnjë moment gjendjes së tij gjyqësore.
Si pjesë e akteve të depozituara pranë Gjykatës së Posaçme është edhe një certifikatë elektronike e gjendjes gjyqësore me nr. prot. 5488 datë 23.01.2025, e gjeneruar nga sistemi i Drejtorisë së Përgjithshme të Burgjeve, ku organi procedues ka akses. Kjo certifikatë, në brendësi të saj përmban informacionin se shtetasi E.V, i biri i L. dhe Sh., lindur më 17.12.1979 në Tiranë, rezulton “i dënuar”.
Në lidhje me këtë certifikatë, Prokuroria e Posaçme i ka kërkuar informacion Drejtorisë së Përgjithshme të Burgjeve në lidhje me veprat penale si dhe vendimet gjyqësore, të cilat lidhen me certifikatën elektronike që është gjeneruar.
Me shkresën nr. 2215/1 datë 12.02.2025, Drejtoria e Përgjithshme e Gjendjes Gjyqësore ka sqaruar mes të tjerash se:
“…çdo herë kur printohet Vërtetimi i Gjendjes Gjyqësore me shënime, del dhe statusi i dënuar si në këtë rast. Shtetasi E. L. V. ka 3 vendime pafajësie.”
Në çdo rast, as në kërkesën e Prokurorisë së Posaçme drejtuar Gjykatës së Posaçme të Shkallës së Parë për Korrupsionin dhe Krimin e Organizuar, por as nga kjo e fundit, nuk është përdorur si rrethanë gjendja gjyqësore e shtetasit nën hetim E.V, për të caktuar ndaj këtij të fundit masën shtrënguese të parashikuar nga neni 238 i Kodit të Procedurës Penale.
