"I prezantoi dëshmitë për lidhjet e Serbisë me sulmet në veri!" Osmani në Bruksel, takim me presidentin e ri të Këshillit Europian

BRUKSEL- Presidentja e Kosovës, Vjosa Osmani, tha se ia ka prezantuar presidentit të ri të Këshillit Evropian, Antonio Costa, “dëshmitë për lidhjet e Serbisë” me sulmin e 29 nëntorit në Zubin Potok dhe të sulmit të armatosur që ndodhi vitin e kaluar në Zveçan.

Osmani u takua me zyrtarin e lartë evropian në Bruksel dhe i tha atij se sulmi në kanalin e ujit të Ibër-Lepencit në Varragë të Zubin Potokur, “kishte për qëllim që të linte një pjesë të madhe të qytetarëve të Kosovës pa ujë, pa energji elektrike, pa ngrohje dhe me pengesa në sistemin e telekomunikimit”.

Autoritetet në Kosovë e fajësojnë Serbinë për sulmin në Zubin Potok dhe për atë në Banjskë të Zveçanit. Por, Serbia ka mohuar përfshirjen në të dy rastet dhe sulmin e 29 nëntorit të këtij viti e ka dënuar, duke shtuar se do të kryejë hetime. Osmani foli edhe për Millan Radoiçiç, i cili ka marrë përgjegjësinë për sulmin e armatosur në Banjskë të Zveçanit më 24 shtator 2023.

Sipas Osmanit, ai është personi që po zbaton “urdhrat e Beogradit zyrtar për sulme ndaj Kosovës”, duke thënë se ai vazhdon të jetë i lirë “dhe kjo dëshmon mungesën e gatishmërisë së Serbisë për përgjegjësi dhe llogaridhënie për aktet e agresionit ndaj Kosovës”. Osmani kërkoi bashkëpunim me faktorin ndërkombëtar për hetimin e sulmit në Varragë të Zubin Potokut.

“Ajo [Osmani] potencoi se është shumë me rëndësi, që përveç hetimit, puna jonë e përbashkët të fokusohet edhe në parandalimin e sulmeve të reja”, u tha në njoftimin e Presidencës kosovare.

Shtetet e Bashkuara dhe Bashkimi Evropian e kanë dënuar ashpër sulmin ndaj kanalit të Ibër-Lepencit dhe i kanë ofruar ndihmë Kosovës. Ky kanal furnizon me ujë nga Liqeni i Ujmanit gjithë veriun e Kosovës, rajonet e Mitrovicës, Prishtinën me rrethinë, si dhe Korporatën Energjetike të Kosovës për ftohjen e termoelektranave të saj.

Osmani dhe Costa po ashtu kanë folur edhe për rrugën e Kosovës drejt Bashkimit Evropian. Presidentja kosovare ka kërkuar mbështetje për aplikimin e Kosovës që të marrë statusin e vendit kandidat dhe heqjen e masave kufizuese të BE-së ndaj Kosovës. Kosova është vendi i vetëm në rajonin e Ballkanit Perëndimor që nuk e ka statusin e vendit kandidat, teksa vendi ka aplikuar për anëtarësim në BE në dhjetor të vitit 2022.

Ndërkaq, BE-ja ende vazhdon të mbajë në fuqi disa masa ndëshkuese ndaj Kosovës që vendosi vitin e kaluar për shkak të tensioneve në veriun e vendit, të banuar me shumicë serbe. Gjatë qëndrimit në Bruksel, presidentja kosovare është takuar edhe me udhëheqësen e Parlamentit Evropian, Roberta Metsola.

Sipas Presidencës kosovare, po ashtu Osmani e informoi Metsolan për “lidhjet e qarta të Serbisë” për sulmet në Kosovë. Osmani, gjatë takimit me presidenten e PE-së, institucion që ka dënuar sulmin në Zubin Potok, ka kërkuar që përgjegjësit për këto krime të përballen me drejtësinë./ REL

bruksel