Në fund të vitit 2025, numri i mjeteve rrugore të regjistruara (me status aktiv ose të çregjistruara përkohësisht) arriti n...
POLITIKE
‘Afera 8 mln euro me parkun voltaik në hetim nga SPAK”, Bardhi: I takon prokurorëve të ‘thyejnë’ mburojën kriminale të Belinda Ballukut
PiranjatPërditësimi i fundit 25 Shtator 2025, 19:36
Pas emërimit të Belinda Ballukut si drejtuese politike e Partisë Socialiste në Tiranë, kreu i grupit parlamentar të Partisë Demokratike, Gazment Bardhi denoncon aferën korruptive me impiantin fotovoltatik në Digën e Zadejës me vlerë 8 milionë.
Bardhi thotë se ka bërë disa denoncime në SPAK për Ballukun dhe se i takon Prokurorisë së Posaçme të dëshmojë nëse ka forcën për të thyer mburojën kriminale të zv/kryeministres.
Reagimi i plotë:
Impianti fotovoltatik në Digën e Zadejës me vlerë 8 milionë euro është një aferë korruptive për të cilën kam bërë kallëzim penal dhe SPAK ka regjistruar zyrtarisht procedimin penal nr. 226/2024. Ky procedim është i katërti në radhë që regjistrohet për Belinda Ballukun, krahas procedimeve penale për tunelin e Llogarasë, shitblerjen e energjisë nga KESH sh.a. dhe dy "tigrat" e Vlorës.
Pas Erion Veliajt, tashmë i shkarkuar nga detyra e kryetarit të Bashkisë Tiranë, i arrestuar dhe i pandehur për korrupsion, pastrim parash dhe fshehje të ardhurash, Edi Rama ia ka besuar drejtimin politik të Tiranës një tjetër simboli të korrupsionit të lartë, shpërdorimit të detyrës dhe pasurimit të paligjshëm. Korrupsioni, abuzimi dhe paligjshëmëria janë oferta e vetme e Edi Ramës për qytetarët e Tiranës, njësoj sikur ai vetë kur ishte kryetar bashkie.
Mbajtja e Belinda Ballukut në qeveri, promovimi i njerëzve të saj në pushtet dhe së fundmi emërimi si drejtuese politike e Tiranës, e shoqëruar me kërcënime të drejtpërdrejta të prokurorëve nga grupe kriminale, ka për qëllim të ndërtojë një mburojë pandëshkueshmërie rreth saj.
Tashmë i takon prokurorëve të SPAK të dëshmojnë nëse kanë forcën ta thyejnë këtë mburojë dhe të ndëshkojnë aferat korruptive të Belinda Ballukut dhe klanit të saj. Në të kundërt, prokurorët do të duhet të pranojnë se mburoja politike dhe kërcënimet kanë funksionuar, dhe ata janë nënshtruar.
