Ditën e Hënë vendi ynë parashikohet të ndikohe nga kushte atmosferike të qëndrueshme.
Moti parashikohet i kthjellët p...
POLITIKE
Iu mbyll faqja online e biznesit/ Lidhja demokratike e gruas: Kandidatja e PD-së në Berat, Fatmira Kola u sulmua në prag të fushatës zgjedhore!
n.fPërditësimi i fundit 13 Prill 2025, 16:54
TIRANË- Lidhja demokratike e gruas së Shqipërisë, LDGSH në një reagim së fundmi ka denoncuar sulmin që po i bëhet kandidates së PD-së në Berat, Fatmira Kola të cilës i kanë mbyllur platformën online të biznesit. Në një deklaratë për mediat, LDGSH thotë se mbyllja e faqes u bë pa lajmërim apo shkresë zyrtare, në prag të fushatës zgjedhore.
Sipas tyre ky është një sulm kundër lirive politike, të shprehjes dhe të sipërmarrjes. Më tej ata theksojnë se mbyllja e platformës është një sulm kundër grave të angazhuara në jetën publike dhe kundër çdo gruaje që synon të ndryshojë realitetin për veten, familjen dhe fëmijët.
LDGSH kërkon që Autoriteti i Komunikimeve Elektronike dhe Postare, AKEP të heqë menjëherë dhe pa vonesë bllokimin ndaj portalit dhe të mos përdoret si instrument politik në duart e kryeministrit Rama. Sipas tyre AKEP është një institucion publik i pavarur dhe duhet të veprojë mbi bazën e ligjit, jo urdhrit politik.
Lidhja Demokratike e Gruas së Shqipërisë (LDGSH) dënon me forcë aktin e rëndë kundër kandidates së Partisë Demokratike në qarkun e Beratit, znj. Fatmira Kola, një nënë, profesioniste dhe sipërmarrëse që ka ngritur me mund dhe ndershmëri një platformë (njoftime.al) për publikimin e pasurive imobiliare, platformë e cila u mbyll në mënyrë arbitrare, pa asnjë njoftim paraprak, pa asnjë shkresë zyrtare, pikërisht në momentin e nisjes zyrtare të fushatës zgjedhore. Ky nuk është një veprim teknik. LDGSH e konsideron këtë një akt të qartë politik, të një shtetit e një Kryeministri hakmarrës, që nuk kursen as gratë që guxojnë të jenë të lira, të pavarura dhe të zëshme.
Ky është një sulm kundër lirive poltiike, të shprehjes dhe të sipërmarrjes! Ky është një sulm kundër grave të angazhuara në jetën publike dhe kundër çdo gruaje që synon të ndryshojë realitetin për veten, familjen dhe fëmijët. Ky nuk është rast i izoluar. Ky është një akt i nxitur nga vetë Kryeministri Rama. Vetëm disa javë më parë, znj. Eda Grimci, Kryetare e degës 9 të PD në Tiranë, u përball me një akt fyes e denigrues e intimidues nga vetë Kryeministri Rama, në një përpjekje të shëmtuar për të përdorur pozitën e tij për të përbaltur dhe frikësuar gratë opozitare. Këto akte përbëjnë dhunë politike dhe institucionale me bazë gjinore. Janë shkelje flagrante të çdo norme demokratike dhe etike, aq më tepër në kuadër të një fushate zgjedhore ku barazia dhe respekti duhej të ishin parimet themelore.
Ne nuk do të heshtim! LDGSH nuk do të heshtë! PD nuk do të heshtë! LDGSH shpreh solidaritet të plotë me znj. Fatmira Kola dhe me çdo grua që sulmohet vetëm sepse guxon të jetë ndryshe. Ne do të jemi në krah, do jemi zëri dhe mburoja për çdo nënë, profesioniste, aktiviste dhe kandidate që nuk pranon të nënshtrohet. Lidhja Demokratike e Gruas së Shqipërisë kërkon:
Autoriteti i Komunikimeve Elektronike dhe Postare (AKEP) të heqë menjëherë dhe pa vonesë bllokimin ndaj portalit njoftime.al; AKEP të mos përdoret si instrument politik në duart e Kryeministrit Rama. AKEP është një institucion publik i pavarur dhe duhet të veprojë mbi bazën e ligjit, jo urdhrit politik. I bëjmë thirrje Komisionerit për Zgjedhjet, Komisionerit për Mbrojtjen nga Diskriminimi, organizatave për të drejtat e grave dhe komunitetit ndërkombëtar të reagojnë për këtë këtë sulm me bazë gjinore dhe këtë situatë situatë alarmante. Në një vend ku nënat përndiqen dhe gratë në politikë sulmohen, demokracia është rrezik!
