"Kampet e emigrantëve në Shqipëri në pritje!" Qeveria Meloni miraton ndryshimet për të "anashkaluar" gjykatat, ja rregullat e reja 

ITALIA- Këshilli i Ministrave i qeverisë italiane vendosi sot për rregullat e reja për dëbimin e emigrantëve nga të ashtuquajturat “vendet e sigurta”, të cilat do të anashkalojnë vendimet e drejtësisë dhe detyrimet e vendosura nga Gjykata e BE-së. Sipas mediave italiane, në pak minuta, Këshilli i Ministrave në Romë miratoi një dekret ligjor që tregon se në cilat vende do të kryhen riatdhesimet e menjëhershme, një formulë “primare” e cila është më e fortë nga pikëpamja legjislative sesa dekreti i thjeshtë i Ministrisë të Punëve të Jashtme i cili ishte në fuqi deri më sot.

Rregullat e reja parashikojnë në masë të madhe listën me 22 shtete të konsideruara të sigurta nga qeveria italiane, duke u përpjekur të “bllokojë” me një ligj më të fuqishëm mundësinë e dëbimit të menjëhershëm për ata që vijnë nga një nga vendet e listës së përpiluar sot. Në ndryshimet e sotme, Këshilli i Ministrave vendosi të ulë numrin e vendeve të sigurta nga 22 në 19, pasi përjashtoi Kamerunin, Kolumbinë dhe Nigerinë.

Mbetet për t’u parë nëse gjykatat italiane, të cilat në 95% të rasteve nuk kishin konfirmuar ndalimin e emigrantëve, do të ndryshojnë qëndrim pas ndryshimeve ligjore të bëra nga qeveria Meloni. Pengesa, në fakt, u vendos nga vendimi i Gjykatës së BE-së i datës 4 tetor, i cili nuk përfshinte shumicën e 22 vendeve në mesin e atyre që janë në gjendje të mbrojnë të drejtat e të gjithë qytetarëve.

Gjyqtarët evropianë kishin specifikuar se një vend nuk mund të jetë i sigurt nëse një pjesë e territorit të tij nuk garanton mbrojtjen e të drejtave të të gjithë qytetarëve, pa përjashtuar asnjë kategori. Prandaj përjashtimi i Kolumbisë, Nigerisë dhe Kamerunit, vende të cilat nuk e plotësojnë këto kritere parashikohet t’i hapë rrugë vazhdimit të marrëveshjes Rama-Meloni.

emigrantet