Partia Demokratike është në gatishmëri të plotë për të garantuar mbrojtjen ligjore të çdo qytetari që...
POLITIKE
Katër ditë protesta, ministri Demo: 156 të lënduar, mes tyre 97 policë dhe 45 protestues
PiranjatPërditësimi i fundit 16 Tetor 2026, 18:23
Ministri i Brendshëm, Ervin Demo, ka reaguar sërish lidhur me protestat që kanë përfshirë Tiranën prej katër ditësh, duke bërë publik bilancin e personave të lënduar dhe duke adresuar akuza ndaj atyre që, sipas tij, qëndrojnë pas incidenteve të dhunshme.
Sipas të dhënave që ka paraqitur ministri, gjatë katër ditëve të fundit janë lënduar 156 persona, mes tyre 97 efektivë policie, 45 protestues dhe 14 kalimtarë. Ai bën të ditur se mes të lënduarve janë edhe katër të mitur.
Demo u ka bërë thirrje prindërve të mos lejojnë përfshirjen e fëmijëve në akte dhune, ndërsa ka theksuar se studentët nuk duhen identifikuar me personat që kanë marrë pjesë në sulme ndaj policisë dhe pronës publike e private.
Në reagimin e tij, ministri pretendon se protestat po shfrytëzohen për qëllime politike dhe se personat që synojnë marrjen e pushtetit me dhunë po rrezikojnë edhe jetën e të miturve.
Reagimi i plotë i ministrit të Brendshëm, Ervin Demo:
Të nderuar qytetarë, nga vala e dhunës që përfshiu kryeqytetin katër ditët e fundit, 156 qytetarë shqiptarë janë lënduar.
97 efektivë policie, të cilët kanë kryer detyrën e që në fund të ditës duan si të gjithë ne të jetojnë paqësisht në vendin tonë e në darkë të kthehen pranë familjeve.
45 protestues, të cilët po ashtu kanë aspiratat e tyre legjitime për të tashmen e të ardhmen në këtë vend, për ta e familjet e tyre, së bashku me 14 kalimtarë, të cilët ndoshta po shkonin drejt familjes apo punëve të tyre.
Të gjithëve, ju uroj shërim të shpejtë, dhe dua t’ju kujtoj se kemi më shumë arsye të bëhemi bashkë e të punojmë në të mirë të vendit e jo të përleshemi për llogari të dikujt që gështenjat e zjarrit të luftës politike kërkon t’i nxjerrë me duart e të tjerëve të verbuar nga urrejtja dhe flakët e ndasisë.
Më kanë mbetur në mendje fjalët e një mjeku te Spitali i Traumës, i cili tha: “Kur vijnë këtu të gjithë janë të humbur, asnjë s’ka fituar.”
Mes të lënduarve ka patur edhe 4 të mitur dhe unë dua të ndalem pak këtu.
Unë nuk besoj se ka prind në Shqipëri, pavarësisht bindjeve të tyre partiake, i cili gëzohet nëse sheh fëmijet e tij të mitur, me gurë apo mjete të tjera në duar, duke goditur punonjës policie, duke thyer xhamat e institucioneve publike, duke shkatërruar semaforë e sinjalistika, duke bastisur e djegur pronën private e publike.
Përdorimi i të miturve në akte thellësisht politike, e aq më tepër vënia në rrezik i jetëve të tyre për hir të luftës në pushtet është një poshtërsi, e cila nuk duhet të kalojë pa u vënë re e pa u përbuzur nga e gjithë shoqëria shqiptare.
Kam porositur vazhdimisht forcat e policisë që të tregojnë kujdes të veçantë me ta, por dua të bëj sërish një thirrje për prindërit. Ju lutem, me dorë në zemër, mos lejoni që fëmijët tuaj të përdoren në luftën për pushtet të atyre që nuk njohin asnjë kufi as njerëzor e as moral.
Prandaj, kur themi se dhuna nuk ka të bëjë me studentët, nuk po bëjmë retorikë. Po refuzojmë të barazojmë studentët me ata që zgjedhin dhunën.
Mes personave të arrestuar e proceduar për akte të dhunshme, numri i studentëve është jashtëzakonisht shumë i vogël dhe jam i bindur që ata nuk kanë fare lidhje me skenarin e dhunshëm politik.
Mund të kemi plot dallime dhe mund të ndahemi në shume opinione, por ka një fakt që nuk e mohon dot askush që ka respekt për të vërtetën. Kjo është një përpjekje e maskuar e atyre që pushtetin duan ta marrin me dhunë e që nuk paskan ndërmend të kursejnë as të miturit e as bizneset private të njerëzve që s’kanë lidhje me betejën e tyre dhe që duan të ndalin rrugëtimin e Shqipërisë drejt Bashkimit Evropian, duke e spostuar vendin nga tryeza e negociatave me BE-në tek rruga e së kaluarës nga kemi dalë me shumë përpjekje.
Dua tju garantoj se nuk do ja dalin!
Shqipëria është nisur tashmë drejt destinacionit dhe askush e asgjë nuk do ta ndalë zhvillimin evropian të vendit!
