Komisioni i Ligjeve/ Bardhi: Marrëveshja për emigrantët me Italinë tani e pazbatueshme! Avokati i Popullit: Kemi detyrimin të mbikëqyrim të drejtat e njeriut në kampe

TIRANA- Komisioni për Çështjet Ligjore ka vijuar me dëgjimin e drejtueses së Avokatit të Popullit, Erinda Ballanca e cila kërkoi një komisioner shtesë për çështjen e emigracionit. Kreu i Grupit parlamentar të Partisë Demokratike, Gazment Bardhi pyeti nëse sipas gjykatave marrëveshja me Italinë për emigrantët tani është e pazbatueshme, a nevojitej më ky komisioner dhe nëse institucioni kishte të drejtë ta mbikëqyrte apo monitoronte kampin. Ballanca tha se e kishin të drejtën e mbikëqyrjes për çështjen e të drejtave të njeriut, duke u koordinuar edhe me palën italiane. Gjithashtu Ballanca shpjegoi se Avokati i Popullit kërkonte një person shtesë në staf për çështjet e emigracionit në tërësi dhe jo vetëm për marrëveshjen.

Pjesë nga diskutimi në Komision:

Ballanca: Kemi kërkuar të shtojmë kapacitetet e mekanizmit kombëtar për parandalimin e torturës edhe me detyrat shtesë që kemi për mbrojtjen e emigrantëve dhe detyrave që do të kemi për mbrojtjen e shtuar që duhet të kemi për marrëveshjen Shqipëri Itali, do të na duhej edhe një komisioner tjetër, nga 4 të bëhen 5.

Bardhi: Ju kërkuat një nënkomisioner për të mbikëqyrur zbatimin e marrëveshjes Shqipëri Itali? Ka juridiksion Avokati i Popullit për të mbikëqyrur këtë marrëveshje? Për sa kohë kampi është jashtë juridiksionit të Shqipërisë, sipas vendimit të Gjykatës Kushtetuese… Edhe ky vendim është pak kontradiktor, sepse nga ana tjetër thotë që Shqipëria duhet ta mbajë një sy brenda kampit. Ka vendim të gjykatave italiane që e bëjnë të pazbatueshme marrëveshjen. Nëse vijon e njëjta situatë dhe aty nuk do të ketë emigrantë..., mbetet nevoja sërish për shtesën që kërkuat?

Ballanca: Ne kërkojmë një person ekstra për çështjen e emigracionit në tërësi, por përveç asaj, Avokati i Popullit beson se ka detyrime për të mbikëqyrur të drejtat e njeriut brenda kampit. Gjykata Kushtetuese  ka thënë se sa i takon të drejtave të njeriut dhe të drejtave konventore, këta emigrantë do të kenë mbrojtje të përforcuar, edhe nga Shqipëria dhe nga Italia. Ne kemi bërë disa takime me homologët italianë, për të pasur një veprimtari të përbashkët dhe për të kordinuar punën për mbrojtjen dhe garantimin e të drejtave themelore. Kemi marrë kontakt dhe jemi duke qartësuar pozicionin tonë. Fakti që ne mendojmë të shkojmë me ekipe të përbashkëta, secili do të ketë mundësi të paraqesë gjetjet e veta sa i takon të drejtave të njeriut.

gazment bardhi