I ftuar në emisionin ‘Kafe Shqeto’ në Syri TV, pedagogu Gjok Vuksani ka akuzuar kryeministrin Edi Rama për gjuhën fyese ndaj s...
POLITIKE
Lista e të ftuarve tradhëtoi maxhorancën, asnjë opozitar. A po ndërhyjnë në zgjedhjet e Maqedonisë së Veriut?
I.APërditësimi i fundit 2 Maj 2024, 14:22
Rama dhe Ahmeti
Dekorimi i Ali Ahmetit si qytetar nderi i Tiranës sot ka bërë që qeveria shqiptare të jap mesazhin direkt se kë mbështet në zgjedhjet që po zhvillohen në Maqedoninë e Veriut. Duket që Ahmeti po e përdor këtë dekorim ndaj tij, si një përparësi dhe favor për të fituar sa më shumë pikë në zgjedhjet parlamentare që po mbahen në Maqedoninë e Veriut.
Ndërkohë që ndryshe nga herët e tjera, ky organizim u pa si një mbledhje politike e PS-së dhe jo një dekorim i Ahmetit. Që nga lista e të ftuarve në ceremoni dukej si një organizim partiak i mbledhur nga Partia Socialiste ku kishte të ftuar ish-politikanë e zyrtarë që kanë mbajtur poste publike në PS.
Ndër ta përmenden Namik Dokle, i cili ka qenë nënkryetar i PS-së, Arta Dade, e cila ka shërbyer si Ministre e Punëve të Jashtme të Shqipërisë nën siglën e PS-së, por nuk kishte asnjë poitikan apo zyrtar të pranishëm nga Kosova apo nga opozita shqiptare. Apo dhe funksionarë socialistë në qeverinë Rama 3 si kryeparlamentarja Lindita Nikolla si dhe Ministri i Brendshëm Taulant Balla.
Kjo lëvizje shihet si një ndërhyrje e qeverisë Rama në zgjedhjet që po mbahen në Maqedoninë e Veriut. Ndërkohë që vetë ai edhe pse nuk e ka mohuar kurrë pëlqimin për Ahmetin, ka deklaruar se nuk do të ndërhyjë në zgjedhjet maqedonse. Edhe pse Rama deklaroi se nuk ka asnjë qëllim që të ndërhyjë në vendimarrjen e zgjedhësve, favorizimi i tij ndaj Ahmetit shihet më shumë se sa një ndërhyrje por një thirrje e hapur për shqiptarët e Maqedonisë së Veriut se kë duhet të votojnë.
“Shqiptarët e Maqedonisë së Veriut nuk do të ishin sot në ditën e tyre më të mirë në historinë e atij shteti dhe as nuk do kishin dot një pluralizëm demokratik aq dinamik brenda perimetrit të jetës së partive shqiptare, sa t’i lejonin vetes edhe shpërfilljen e rrezikut të mbytjes në lugën e ujit të sherrit për më shumë pushtet, duke nënvlerësuar mundësinë reale të dobësimit politik te faktorit shqiptar. Ky mund të jetë rasti por nuk është momenti që të shtjelloj më tutje këtë që thash sepse nuk dua në asnjë mënyrë që një shprehje e plotë e opinionit tim sot të lexohet si ndërhyrje në fushatën zgjedhore të vendit fqinj, ku ne s’kemi asnjë qëllim të ndikojmë në vendimmarrjen e zgjedhësve të atij vendi, qoftë edhe të shqiptarëve”, tha Rama.
Edhe pse detyrimisht duhet të ishin të pranishëm, asnjë këshilltarë bashkiak opozitarë nuk ishte i ftuar në ceremoni si dhe asnjë emër nga Opozita. Ndërkohë që këshilltarët socialistë kishin mbushur karriget për të shtuar të pranishmit në ceremoni, dukej sikur këshilltarët opozitarë ishin shpallur 'non grata' nga kryebashkiaku Veliaj, i cili nguron që të dalë para tyre për shpjegime në lidhje me korrupsionin dhe vjedhjet nga drejtorët e tij.
Ajo që bën më shumë përshtypje është dhe mungesa e politikanëve nga Kosova apo qeveria Kurti. Kjo pasi, Kurti i ka dalë në mbështetje hapur në zgjedhjet parlamentare të Maqedonisë së Veriut koalicionit VLEN të përfaqësuar nga Arben Taravari. Ndërkohë që më herët, Ahmeti e ka akuzuar Kurtin për ndërhyrje në punët e brendshme të Maqedonisë së Veriut.
Ndërkohë që në Maqedoninë e Veriut situata politike është e dominuar nga ethet e zgjedhjeve parlamentare, të cilat dhe do të përcaktojnë qeverinë apo koalicionin qeveritar që do të udhëheqë vendin, Ahmeti po luan çdo kartë që ka në dorë për tu futur në qeveri. Disa ditë më parë ai i dërgoi mesazh të drejtëpërdrejtë forcës së parë politike në Maqedoninë e Veriut se nuk mund të bëjnë gabimet e kaluara por të zgjedhin forcën e BDI-së për të formësuar qeverinë.
Një tjetër lëvizje e Ahmetit për të siguruar sa më shumë vota në raundin e dytë të zgjedhjeve që do të mbahen më 8 Maj. Edhe pse forca që ai drejton BDI-ja ka arritur që të mbaj vendin e tretë në raundin e parë, kjo nuk është e mjaftueshme që Ahmeti që jetë në qeverinë e re maqedonase. Ndërkohë që kjo dekoratë si qytetar nderi i Tiranës, padyshim që përdoret si një as nën mëngë për të fituar popullaritet te shqiptarët e Maqedonisë së Veriut.
