Lobimi i PD-së në SHBA/ Kreu i Fondacionit Shqiptaro-Amerikan, Nuredin Seci: Çdo gjë është transparente, kontratën e ka DASH

nuredin seci

TIRANË- Fondacioni Shqiptaro-Amerikan ka nënshkruar një marrëveshje për të lobuar në favor të Partisë Demokratike pranë qeverisë amerikane. Marrëveshja është firmosur nga Nuredin Seci, një shqiptaro-amerikan që jeton në New York dhe ish-këshilltari i presidentit Trump, Carlo Trujillo, në cilësinë e Presidentit të Continental Strategy. 

Seci ka bërë dhe reagimin e parë pas publikimit të kontratës. Përmes një mesazhi të dërguar në emisionin “Shqipëria Live” në Top Channel, është shprehur se ndodhet me pushime me familjen dhe nuk mundet të flasë për momentin.

“Ju faleminderit për interesimin por unë këto ditë jam me pushime me familjen larg e jam i pa mundur, për lobimin flet kontrata e ka Departamenti i Shtetit e besoj që këtu çdo gja bahet transparente! Ju faleminderit për mirëkuptimin”, ka shkruar ai.

Përveç Nuredin Secit dhe Carlo Trujillo, kontrata është firmosur edhe nga sekretari i përgjithshëm i PD, Flamur Noka, në cilësinë e përfituesit, një detyrim ky i kërkuar nga ligji amerikan. Kjo marrëveshje mund të kushtojë deri në 6 milionë dollarë për 4 vite, por përfaqësues të Partisë Demokratike thonë se kjo kontratë mund të ndërpritet edhe më shpejt se afati dhe shuma e paguar.

Në reagimin e saj, PD ka theksuar se ka qenë komuniteti shqiptaro-amerikan që përmes fondacionit “Make Albania Great Again” ka kontraktuar kompaninë “Continental” për të ndihmuar në konsolidimin e mardhënieve miqësore të PD-së me Kongresin dhe Qeverinë e SHBA-së. PD- ja u shpreh gjithashtu se kontributi financiar për realizimin e këtij qëllimi është marrë përsipër 100% nga patriotë shqiptarë që jetojnë në SHBA. Ndërkohë një ditë më parë, Prokuroria e Posaçme njoftoi se ka nisur verifikimin lidhur me kontratën e lobimit të Partisë Demokratike.

nuredin seci