Protestat në Tiranë vijojnë me përplasje mes demonstruesve dhe policisë së rendit, shkruan BBC. Nxënësit e shkollave t...
POLITIKE
Mbyllja e TikTok/ Arlind Qori: Vendimi 5 muaj para zgjedhjeve, videot në këtë platformë janë më të ndjekura dhe më të pëlqyera
M.B.Përditësimi i fundit 27 Dhjetor 2024, 12:35
TIRANA- Kreu i Lëvizjes Bashkë Arlind Qori ka bërë një postim në rrjetet sociale ku thotë se ka njerëz që i sugjerojnë që të mos ankohet për mbylljen e Tiktokut nga kryeministri Edi Rama pesë muaj përpara zgjedhjeve sepse janë ende platformat e tjera sociale.
Qori sjell shembullin e një videoje të tij për të cilë thotë se ndonëse është postuar në disa rrjete sociale, videoja në Tiktok ka pasur 15 herë më shumë shikueshmëri dhe pëlqyeshmëri krahasuar me Facebook-un dhe diç më pak në krahasim me Instagramin. Ai shton se do të mësohen shumë shpejt edhe me mbylljen e Tiktokut, duke intensifikuar punën në rrugë me qytetarët dhe kreativitetin në botën virtuale.
POSTIMI:
Ka njerëz të patëkeq që më sugjerojnë të mos ankohem për mbylljen e Tiktokut nga Edi Rama pesë muaj përpara zgjedhjeve sepse janë ende platformat e tjera sociale. Po iu përgjigjem me shembullin e videos sime të fundit të postuar sot paralelisht në TikTok, Facebook dhe Instagram. Ndonëse janë postuar pranë njëra-tjetrës në kohë, videoja në Tiktok ka pasur 15 herë më shumë shikueshmëri dhe pëlqyeshmëri krahasuar me Facebook-un dhe diç më pak në krahasim me Instagramin. Profili im në Facebook është mbi 15-vjeçar dhe jam përdorues i rregullt i tij ndër vite.
Në Tiktok nuk kam më shumë se dy vite e ca, por hendeku në ndjekshmëri dhe pëlqyeshmëri midis këtyre dy platformave është si abis. Nuk di ta shpjegoj teknikisht këtë ndryshim, por kam përshtypjen se Tiktoku është më demokratik në përcjelljen e mesazhit, ndërkohë që platformat e tjera funksionojnë sipas modelit të fluskës së ndjekësve të zakonshëm. Për të mos përmendur se këto të fundit janë gjithnjë e më të zhytura në logjikën e pagesës për të rritur shikueshmërinë, çka unë e refuzoj dhe do ta refuzoj gjithmonë.
Sidoqoftë Tiktoku është thjesht një mjet. Të mësuar me mënjanimin nga televizionet, unë dhe aktivistët e Lëvizjes BASHKË gjetëm Tiktokun për të komunikuar me qindra mijëra qytetarë (mbi 1 milion pëlqime kanë marrë gjithsej postimet e mia në Tiktok). Do të mësohemi shumë shpejt edhe me mbylljen e Tiktokut, duke intensifikuar punën në rrugë me qytetarët dhe kreativitetin në botën virtuale. Sepse, siç thuhej një herë e një kohë, asgjë nuk mund ta ndalë një ide të cilës i ka ardhur koha. Kjo ide e ka një trup politik që quhet Lëvizja BASHKË.
