Sindikata e Punonjësve të Universiteteve të Shqipërisë (SPUSH) i është bashkuar reagimeve ndaj dhunës policore ndaj st...
POLITIKE
Publikohet pr.vendimi i dakordësuar mes palëve për ngritjen e Komisionit të Posaçëm të Reformës Zgjedhore/ Ja çfarë parashikon
PiranjatPërditësimi i fundit 24 Tetor 2025, 12:21
Kuvendi i Shqipërisë ka paraqitur një projektvendim për ngritjen e Komisionit të Posaçëm Parlamentar për Reformën Zgjedhore, i cili do të fokusohet në hartimin e ndryshimeve ligjore dhe trajtimin e rekomandimeve të OSBE/ODIHR-it dhe institucioneve të tjera ndërkombëtare.
Sipas dokumentit zyrtar, ky komision do të merret me disa çështje kyçe, përfshirë:
- Hartimin e ndryshimeve ligjore që lidhen me reformën zgjedhore.
- Shqyrtimin e rekomandimeve të OSBE/ODIHR-it për zgjedhjet vendore të 14 majit 2023 dhe ato parlamentare të 11 majit 2025, si dhe për zgjedhjet e mëparshme që nuk janë trajtuar.
- Vlerësimin e propozimeve të institucioneve zgjedhore, partive politike parlamentare dhe organizatave jofitimprurëse.
- Hartimin e një ligji të ri për financimin e partive politike.
Komisioni do të ngrihet sipas parimit të barazisë pozitë-opozitë, dhe do të përbëhet nga 16 anëtarë, 7 nga Partia Socialiste, 7 nga Partia Demokratike dhe 2 nga partitë që kanë fituar të paktën dy mandate në zgjedhjet parlamentare të 11 majit 2025.
Drejtimin e komisionit do ta marrë një ekip i përbashkët, me dy bashkëkryetarë, një nga PS dhe një nga PD. Për të mbështetur punën e komisionit, do të ngrihet gjithashtu një grup ekspertësh teknikë, ndërsa procesi do të shoqërohet nga pjesëmarrja e përfaqësuesve ndërkombëtarë, përfshirë OSBE-në, OSBE/ODIHR-in, Këshillin e Europës, Komisionin e Venecias, si dhe ekspertë të Bashkimit Europian dhe Shteteve të Bashkuara të Amerikës.
