Rama, Kurti dhe Vuçiç sot në Bruksel, Von der Leyen mbledh në drekë pune me liderët e Ballkanit Perëndimor

Albin Kurti, Usula von der Leyen, Edi Rama, Aleksandër Vuçiç

BRUKSEL- Presidentja e Komisionit Evropian, Ursula von der Leyen do të mbledhë sot në një drekë pune në Bruksel liderët e vendeve të Ballkanit Perëndimor. Mësohet se të pranishëm në drekën e punës do të jenë kryeministri Edi Rama, kryeministri i Kosovës, Albin Kurti dhe presidenti serb Aleksandër Vuçiç.

Qëllim kryesor i këtij takimi është diskutimi për “axhendat e reformave dhe rritjes”, të cilat gati të gjitha vendet e rajonit të Ballkanit Perëndimor i kanë dorëzuar në Komisionin Evropian, si parakusht për të pranuar pagesat e para nga Plani i Rritjes për Ballkanin Perëndimor, i miratuar nga BE-ja në maj të këtij viti.

Von der Leyen ka qenë e angazhuar në promovimin e këtij plani, ndërsa atë e ka mbështetur edhe Parlamenti Evropian dhe vendet anëtare në Këshillin e BE-së. Vendet e Ballkanit Perëndimor duhej të përgatisnin një agjendë reformash, të bazuar në rekomandimet paraprake të trupave të BE-së. Bosnje e Hercegovina është e vetmja në rajon e cila, për shkaqe të brendshme politike, nuk e ka bërë ende.

Nga ana tjetër, Kosova, ka qenë ndër vendet e para që e ka dorëzuar planin e saj në Komisionin Evropian. Gjatë prezantimit të këtij plani, vendeve të rajonit u është thënë qartë se nëse nuk i kryejnë reformat pas një apo dy vjetësh, atëherë shuma do t’u shpërndahet vendeve tjera. Përmes Planit të Rritjes për Ballkanin Perëndimor, Bashkimi Evropian planifikon të ndajë rreth 6 miliardë euro për vendet e këtij rajoni në periudhën prej vitit 2024 deri në vitin 2027.

albin kurti usula von der leyen edi rama aleksandër vuçiç