Një protestues i pranishëm para Ministrisë së Arsimit ka ironizuar efektivët e policisë për sjelljen e tyre gjatë protes...
POLITIKE
Rama ‘shpërblen’ anti-Velianët, i fton në selinë e qeverisë
PiranjatPërditësimi i fundit 24 Shtator 2025, 13:46
Një ditë pas shkarkimit të kryebashkiakut të Tiranës, Erion Veliaj nga Këshilli Bashkiak, kryeministri Edi Rama nuk ka qëndruar duarkryq në lëvizjen e tij të radhës kundër Veliaj.
Pasi ‘lau hesapet’ me Erion Veliajn, tanimë të shkarkuar, pasditen e kësaj të mërkure, kreu i qeverisë mblodhi në Kryeministri, nënkryetarët e Bashkisë së Tiranës, të cilët nuk ngurruan të dilnin kundër kryetarit të tyre.
E pranishme në takimin me nënkryebashkiakët e Tiranës, ishte edhe kandidatja e PS për postin e kryetarit të Bashkisë, Ogerta Manastirliu.
Ende nuk dihet se cila do të jetë fokusi i takimit, por dyshohet se Rama do të kërkojë angazhim maksimal të deputetëve në zgjedhjet e pjesshme që do të mbahet në Tiranë.
SPAK nga ana tjetër ka përfunduar hetimet dhe ka dërguar për gjykim në Gjykatën e Posaçme të Shkallës së Parë dosjen e kryebashkiakut Erion Veliaj. Në dosjen e kopsitur nga SPAK 13 akuza që rëndojnë mbi Veliajn dhe 12 akuza që rëndojnë mbi bashkëshorten e tij, Ajola Xoxa. Në përfundim të hetimeve paraprake, ka rezultuar se Veliaj dhe Xoxa, në bashkëpunim mes tyre, në 9 raste të veçanta, kanë marrë përfitime të parregullta në formën e shumave monetare dhe pasurive të paluajtshme, nga subjekte tregtarë dhe organizata jofitimprurëse, të cilët nga ana e tyre kanë marrë leje ndërtimi dhe përfituar fonde publike nga Bashkia Tiranë.
Nga hetimi penal janë grumbulluar të dhëna konkrete, të cilat provojnë se Veliaj, në cilësinë e Kryetarit të Bashkisë Tiranë, me nënshkrimin e tij ka miratuar në çdo rast shpërndarjen e këtyre fondeve, të cilat më pas kanë përfunduar tek OJF-të e kontrolluara nga bashkëshortja e tij dhe individë të afërt me të. Gjithashtu, këta të pandehur, për shkak të funksionit që kryen Veliaj, kanë përfituar në mënyrë të parregullt edhe pasuri të paluajtshme në vlerë të konsiderueshme nga subjekte tregtarë që kanë marrë fonde publike dhe leje ndërtimi nga Bashkia Tiranë.
Në të gjitha këto episode të pandehurit, në bashkëpunim me njëri tjetrin, kanë konsumuar elementët e veprës penale të parashikuar nga neni 260 i Kodit Penal. Shoqëritë me përgjegjësi të kufizuar si edhe organizatat jofitimprurëse të lartpërmendura, duke dhënë përfitime të parregullta për shkak të detyrës që kryen i pandehuri Erion Veliaj, kanë konsumuar elementët e parashikuar nga neni 245 i Kodit Penal./piranjat.al
