Revolta e opozitës/ PS depoziton në Parlament kërkesën për përjashtimin e 24 deputetëve të PD-së 

TIRANA- Partia Socialiste ka depozituar në Parlament kërkesën për përjashtimin e 24 deputetëve të PD-së pas revoltës së ditë së djeshme në seancë plenare. Ndërkohë, brenda 48 orëve pritet të mblidhet Sekretariati i Etikës për masat për 24 deputetët e PD-së.

PS ka kërkuar marrjen e masës disiplinore ndaj deputetëve Gazmend Bardhi, Flamur Noka, Bledion Nallbati, Edi Paloka, Saimir Korreshi, Lefter Geshtenja, Luan Baçi, Dashnor Sula, Agron Gjekmarkaj, Dhurata Çupi, Xhelal Mziu, Ina Zhupa, Zheni Gjergji, Helidon Bushati, Lindita Metaliaj, Ramadan Lika, Asllan Dogjani, Qani Xhafa, Flamur Hoxha, Isuf Çela, Kastriot Piroli, Lodovik Hasani, Kasem Mahmutaj, Edmond Spaho.

Opozita ka nisur dje bojkotimin e çdo mbledhjeje parlamentare, aksion i cili vijoi edhe në Kuvend, ku deputetët e Partisë Demokratike kanë penguar zhvillimin normal të seancës. Që në nisje të seancës ata rrëzuan foltoren, ndërsa morën dhe prishën edhe karriget ku ulen. Në një moment, kreu i Grupit Parlamentar të Partisë Demokratike Gazment Bardhi ka hedhur këmbën e karriges në drejtim të kryeparlamentares Elisa Spiropali.

Kjo e fundit është ndihmuar edhe nga një punonjës i Gardës, që e ka mbrojtur kryetaren e Kuvendit, ndërsa copa e hedhur e karriges përfundoi anash saj. Pas kësaj, opozita nxorri jashtë karriget e tyre dhe iu vunë flakën. Kreu i grupit të PD-së, Gazment Bardhi tha se janë aty jo për karriget e tyre por për të mbrojtur interesin publik. Ai shtoi se nuk kanë djegur mandatet, pasi nuk shmangen nga beteja e tyre.

kuvend