Dashi
Do merrni fryme lirisht gjate gjithë kësaj dite dhe gjerat kane për te ecur për mrekulli mes jush dhe atij qe keni ne krah. B...
POLITIKE
Sadushi ndal fokusin te çështjet e prapambetura: Pa vlerësim në kohë nuk ka meritokraci e karrierë të drejtë
PiranjatPërditësimi i fundit 28 Prill 2026, 13:25
Kryetari i Gjykatës së Lartë, Sokol Sadushi, mori pjesë në mbledhjen e përbashkët të Këshillit të Lartë Gjyqësor dhe Këshillit të Lartë të Prokurorisë, me temë vlerësimet etiko-profesionale të magjistratëve dhe masat për uljen e backlog-ut.
Në fjalën e tij, Sadushi theksoi se vlerësimi etik dhe profesional i magjistratëve nuk është një procedurë formale, por një mekanizëm thelbësor për meritokracinë, karrierën dhe funksionimin e sistemit të drejtësisë.
Ai nënvizoi se vlerësimi në kohë ndikon drejtpërdrejt në emërimet, ngritjet në detyrë, lëvizjet paralele, transferimet, komandimet dhe delegimet e magjistratëve. Sipas tij, vonesat në këtë proces nuk janë thjesht problem administrativ, por ndikojnë në plotësimin e vakancave, në funksionimin e gjykatave dhe prokurorive, si dhe në uljen e çështjeve të prapambetura. Kryetari i Gjykatës së Lartë u shpreh se reforma në drejtësi nuk synoi vetëm krijimin e institucioneve të reja, por ndryshimin e mënyrës se si sistemi vetëqeveriset, promovon, kontrollon dhe mban përgjegjësi. Në këtë kuptim, ai theksoi se institucionet e reja nuk mund të përsërisin dobësitë që karakterizuan sistemin para reformës.
Në fjalën e tij, Sadushi evidentoi edhe vonesat në plotësimin e dy vendeve vakante në Gjykatën e Lartë, duke theksuar se një gjykatë më e lartë e paplotësuar në kohë humbet kapacitet vendimmarrës dhe e ka më të vështirë të vijojë me ritmin e uljes së backlog-ut.
Në përfundim, Kryetari i Gjykatës së Lartë bëri thirrje që vlerësimi etiko-profesional të trajtohet si prioritet strategjik nga KLGJ dhe KLP, përmes një plani konkret veprimi, me afate të qarta, objektiva të matshme, përgjegjësi të përcaktuara dhe raportim periodik publik.
