Shtyhet seanca për "Gërdecin"/ Gjykata i lë kohë mbrojtjes të përgatisë pyetjet për ekspertët ushtarakë, Mediu: Absurde që ministri të gjykohet për elementë që nuk lidhen me detyrën e tij

fatmir mediu

TIRANË- Seanca në ngarkim të ish-ministrit të Mbrojtjes, Fatmir Mediu për çështjen "Gërdeci" është shtyrë sërish sot. Gjykata e Posaçme ka vendosur që seanca e radhës të mbahet më 27 dhjetor në orën 12:00. 

Shkak për shtyrjen e seancës, ishte vendimi i gjykatës për t'i lënë kohë avokatëve mbrojtjës të përgatisin pyetjet për ekspertët ushtarakë që kanë përcaktuar edhe shkakun e shpërthimit në Gërdec. Mediu foli jashtë ambienteve të gjykatës për mediat, ku tha se është absurde dhe e papranueshme që një ministër të gjykohet për çështje janë të karakterit ushtarak, që sipas tij nuk lidhen me detyrën e tij. 

"Është një situatë kaq absurde sa është tërësisht e papranueshme që ministri të gjykohet se ca janë kalibrat apo elemente të tjerë që nuk kanë të bëjnë me detyrën e tij. Këto çështje janë të karakterit ushtarak. Ne jemi vend anëtar i NATO-s dhe janë të ndara përgjegjësitë civile dhe ushtarake. Jemi në një realitet që është absurd. Fakti për debatin e sotëm ishte sepse dy nga ekspertët nuk ishin prezent dhe do kishim dy procese paralele, duhet ti çonim atyre pyetjet me shkrim për të marrë përgjigjet dhe pjesa tjetër do përgjigjej me gojë. Pra për të pasur një proces korrekt u la që ti përcillen pyetjet me shkrim. Edhe pse ne kërkuam që debati të behej drejtpërdrejt, sepse ata janë ekspertë dhe kanë dijeni mbi ate se cfarë kanë shkruar. Por në këto rrethana u gjykua që ishte korrekte për të pasur një përgjigje nga të gjithë ekspertët sesa të kemi dy procese paralele”, u shpreh Mediu jashtë GJKKO.

Ish-ministri Fatmir Mediu po përballet tashmë prej vitesh në GJKKO me akuzën e “Shpërdorimit të detyrës”, për ngjarjen e ndodhur në 15 mars 2008 në fshatin Gërdec, ku pas një shpërthimi në fabrikën e demontimit të armëve, humbën jetën 26 persona.

fatmir mediu gjkko