Në ditën e nisjes së gjyqit të themelit për dosjen “Partizani”, ish-kryeministri Sali Berisha ka mohuar akuzat e ngritura...
POLITIKE
"Sytë e botës i kemi të përqendruar tek ne!" Marrëveshja për emigrantët, Meloni: Profesionistët e emigracionit të parregulluar do të bëjnë gjithçka për t'i vënë shkopinj nën rrota nismës
M.B.Përditësimi i fundit 5 Shtator 2024, 12:46
Giorgia Meloni dhe Edi Rama
ITALIA- Kryeministrja italiane Giorgia Meloni ka folur së fundmi lidhur me hapjen e qendrave të pritjes së emigrantëve të ndërtuara në Shëngjin dhe Gjadër. Meloni është shprehur se ato do të jenë funksionale brenda pak javësh, ndonëse nuk ka specifikuar një datë.
Ajo ka shtuar se protokolli me Shqipërinë do të jetë gati gjithashtu brenda pak javëshdhe se duhet të jenë të kujdesshëm ndaj projektit pasi, sipas saj, sytë e botës janë përqëndruar te ta. Deklaratat Meloni i bëri gjatë një raporti drejtuar drejtuesve të partisë së saj.
Gjithashtu Meloni ka thënë se të gjithë duhet ta kuptojnë se kjo nismë mund të ndryshojë tërësisht mënyrën e qeverisjes së emigracionit të parregullt. Sipas saj, profesionistët e emigracionit të parregulluar e kuptojnë dhe ata do të bëjnë gjithçka për t'i vënë shkopinj nën rrotat kësaj nisme.
"Brenda pak javësh do të jetë gati Protokolli me Shqipërinë dhe duhet të jemi shumë të kujdesshëm dhe skrupuloz ndaj këtij projekti sepse sytë e botës i kemi të përqendruar tek ne.
Të gjithë e kuptojnë se kjo nismë mund të ndryshojë tërësisht mënyrën e qeverisjes së emigracionit të parregullt. Ne e kuptojmë dhe profesionistët e emigracionit të parregulluar e kuptojnë dhe ata do të bëjnë gjithçka për t'i vënë shkopinj nën rrotat kësaj nisme", ka thënë Meloni.
Kryeministrja italiane Giorgia Meloni dhe homologu i saj shqiptar Edi Rama kanë nënshkruar një marrëveshje për ndërtimin e dy objekteve të pritjes së emigrantëve në Shqipëri për ndalimin e emigrantëve që tentojnë të arrijnë në Itali përmes detit, ndërkohë që kërkesat e tyre për azil shqyrtohen. Qendrat, të cilat janë planifikuar të hapen këtë muaj, do të paguhen nga kabineti italian.
Datat për fillimin e funksionimit të tyre janë shtyrë vazhdimisht. Para disa ditës, vetë Meloni ka theksuar se janë hasur vështirësi operacionale në ngritjen e këtyre qendrave, ndërsa ka shpjeguar se qendrat e pritjes së emigrantëve në Shqipëri do të shërbejë dhe si një model inovativ për vendet e tjera, duke iu referuar disa deklaratave të bëra nga shtetet anëtare të BE-së.
