Kanë përfunduar fjalimet e aktivistëve dhe qytetarëve përpara godinës së Kryeministrisë, ndërsa protesta qytetare k...
POLITIKE
"Të anulohet votimi i Komisionit Rregullator"/ Bardhi shkresë Niko Peleshit: Nuk keni kapacitet për të drejtuar Kuvendin
PiranjatPërditësimi i fundit 31 Tetor 2025, 11:04
Kryetari i Grupit Parlamentar të Partisë Demokratike, Gazment Bardhi, i është drejtuar me një shkresë Kryetarit të Kuvendit, Niko Peleshi, duke i bërë të ditur se ka shkelur Kushtetutën dhe Rregulloren e Kuvendit në zgjedhjen e Kryetarit dhe anëtarëve të Komisionit Rregullator të Komisionit Qendror të Zgjedhjeve.
Gazment Bardhi argumenton se neni 17, pika 1 e Kodit Zgjedhor, specifikon qartësisht se: “Komisioneri, anëtarët e Rregullatorit dhe anëtarët e KAS-it zgjidhen nga Kuvendi i Republikës së Shqipërisë me jo më pak se tre të pestat e votave të të gjithë anëtarëve të Kuvendit.”
“Në këtë kuadër, sa kohë ligji kërkon një shumicë të cilësuar prej 3/5 së anëtarëve të Kuvendit, sipas pikës 3, të nenit 55 të Rregullores së Kuvendit, projektvendimet përkatëse nuk mund të konsiderohen të miratuara. Për këtë arsye, në mbështetje të nenit 61 të Rregullores së Kuvendit, ku specifikohet se: ‘Çdo votim i kryer në kundërshtim me Kushtetutën, ligjin ose Rregulloren e Kuvendit është i pavlefshëm’, kërkojmë që, pasi të merrni edhe mendimin e Sekretariatit për Procedurat dhe Votimet, të urdhëroni anulimin e votimit dhe përsëritjen e menjëhershme të tij”, shkruan Bardhi.
Më tej, Kryetari i Grupit të PD-së thekson se kjo është një tjetër arsye pse Niko Peleshi do duhej të ishte shkarkuar si kryeparlamentar.
“Ky rast provon edhe njëherë se mocioni i opozitës për shkarkimin tuaj ishte i drejtë. Ju nuk keni as kapacitetin dhe as integritetin e duhur për drejtimin e Kuvendit. Ju vijoni të mendoni se urdhri politik i Taulant Ballës është mbi Kushtetutë, mbi ligj, mbi Rregulloren e Kuvendit. Ju vijoni të keni bindjen se mjafton të votojë ‘pro’ Taulant Balla dhe aktet në Kuvend s’kanë nevojë për kuorum sipas ligjit, sepse i quani të miratuara.” Gazment Bardhi kërkon anulimin e votimit dhe përsëritjen e tij.
