Reperi i njohur kosovar, Capital T, u ka bërë thirrje mediave në Kosovë që tu kushtojnë më shumë vëmendje zhvillime...
POLITIKE
Tela: Çështja Balluku bllokoi rrugën e Shqipërisë drejt BE, shtetit ligjor është vënë në dyshim
PiranjatPërditësimi i fundit 18 Mars 2026, 19:03
Gazetari Andi Tela, i ftuar në emisionin ‘Task Force’ me Sonila Meço në SYRI TV, deklaroi se zhvillimet e fundit në raportet mes Shqipërisë dhe Bashkimit Evropian lidhen drejtpërdrejt me mënyrën si qeveria ka trajtuar çështjen e zëvendëskryeministres Belinda Balluku.
Sipas Telës, nga deklarata e parë e Marta Kos në nëntor e deri në mars, ndryshimi kryesor ka qenë në sjelljen e mazhorancës dhe të kryeministrit Edi Rama. Ai theksoi se, megjithëse Shqipëria hapi të gjithë kapitujt e negociatave brenda një viti, një proces i cilësuar si rekord, në vetëm pak muaj është vënë re një ndryshim në gjuhën dhe qëndrimin e BE-së.
Tela argumentoi se mbyllja e kapitujve kërkon përmbushjen e standardeve, ku më kryesori është funksionimi i shtetit ligjor. Sipas tij, ky standard nuk është respektuar, duke përmendur si shembull trajtimin e çështjes Balluku, ku sipas tij nuk u veprua në përputhje me parimin e barazisë para ligjit.
Ai shtoi se reagimi i vendeve anëtare të BE-së ishte i menjëhershëm dhe i unifikuar, duke sinjalizuar se veprimet e qeverisë shqiptare nuk përputhen me standardet evropiane. Në këtë kontekst, Tela e lidh edhe vlerësimin negativ të raportit të Raporti i IBAR me këtë situatë.
‘Nga 4 nëntori që ishte deklarata e parë e Marta Kosës, e deri tash në mars, e vetmja gjë që ka ndryshuar është sjellja e mazhorancës dhe e qeverisë, mbi të gjitha kryeministrit Rama, me çështjen Balluku. Ajo është çelësi i shpjegimit të gjithë mënyrës se si ka ndryshuar artikulimi qoftë i BE-së, qoftë i Ramës.
Në rast se në 4 nëntor e më tej në 4 dhjetor u hapën Shqipërisë të gjitha kapitujt, brenda një viti, duke u cilësuar rekord dhe duke u gëzuar të gjithë me suksesin e Shqipërisë, dhe mbi të gjitha kryeministri për atë që kishte bërë qeveria e tij, papritur për dy muaj, dy muaj e pak, kemi një ndryshim të gjuhës së BE-së në raport me Shqipërinë. Dhe nuk ka ndodhur asgjë tjetër përveç se ka qenë çështja Balluku fabula e këtyre dy muajve, dy muajve e gjysëm.
Kapitujt hapen dhe duhet të mbyllen, por që të mbyllen kapitujt, ti duhet të realizosh disa detyra dhe duhet të kapësh disa standarde. Standardi thelbësor është kapitulli i parë, është funksionimi i ligjit dhe i shtetit ligjor.
Nuk ka funksionuar. Nëse të gjithë janë shprehur se e vetmja mënyrë për të plotësuar standardet e BE-së është të sillesh se si sillen ata në rrethana të tilla, qeveria shqiptare, kryeministri nuk bëri gjë tjetër veçse ndryshoi standartin.
Tha, të gjithë qytetarët të barabartë përpara ligjit, reforma në drejtësi funksionon për të gjithë qytetarët, por për zv/kryeministren, për anëtaren tonë të qeverisë nuk funksionon. Dhe përgjigja e menjëhershme e asaj dite e vendeve anëtare të BE-së ishte moto a mo, i njëjti tekst i përshtatur nga ambasada gjermane, nga ambasada suedeze, nga ambasada holandeze, me të njëjtin tekst, me të njëjtin paragraf dhe me të njëjtin shpjegim që çfarë po bëhet këtu nuk është sipas standardeve tona.
Testi kritik i artikuluar këtu në mes të Tiranës nuk u plotësua dhe mënyra se si u soll qeveria shqiptare me çështjen Balluku, mazhoranca socialiste me çështjen Balluku, është shpjegimi i përgjigjes, të themi negative, të raportit të Ibar. Raporti i Ibar, i cili është një raport shumë i rëndësishëm për të kuptuar që janë hapur të gjithë kapitujt dhe tashti duhet të fillojë me radhë mbyllja e tyre, nuk ka marrë okej-in nga njerëzit që duhet ta japin atë.
Por, standardi është i tillë që po, janë hapur kapitujt. Tani duhet të fillojmë t'i mbyllim. Përpara se t'i mbyllim kapitujt, duhet të kuptojmë në çfarë stadi ndodhet Shqipëria. Dhe Shqipëria ndodhet në stadin që zv/kryeministres nuk i hoqën imunitetin për ta çuar përpara drejtësisë, përpara reformës në drejtësi e cila ka qenë kali i betejës së Shqipërisë për t'u anëtarësuar në BE.
Kanë qenë dy gjëra. Deklarata e Marta Kos me kalin e trojës më tepër i referohej Vuçiç sesa Edi Ramës. Dhe në gjithë këtë histori, Vuçiç mund edhe të fitojë diçka. Serbia ka dhe një tjetër rrethanë ë? Ka disa rrethana që standartet për Rusinë janë më të ndryshme sesa për Shqipërinë. Pra, parakushtet e Serbisë, përtej plotësimit të standardeve, kanë të bëjnë me mënyrën e sjelljes së saj në raport me Rusinë dhe ka një kusht tjetër që ka të bëjë me ligjin, me zbatimin e ligjit atje, por më e rëndësishmja, që na përket dhe neve, është mënyra e sjelljes së saj me Kosovën. Pra, këto janë tre kushtet kryesore që i vendoset Vuçiçit dhe Serbisë për t'u anëtarësuar në BE. Kështu që ata mund të tolerojnë ç'të duan për të plotësuar tre kushte. Shqipëria nuk ka asnjë kusht të tillë.
Dhe në këtë histori të letrës së Vuçiç dhe Ramës, Vuçiç edhe mund të fitojë ndonjë gjë. Edi Rama dhe Shqipëria nuk fitojnë asgjë’, tha Andi Tela ndër të tjera në SYRI TV.
