Astrit Idrizi, 35-vjeçari i arrestuar për zjarrin në banesat sociale në Shkozë ku humbën jetën dy të moshuar, dyshoh...
POLITIKE
Tirana në kaos total/ Protestuesit shpërndahen nëpër rrugë e lagje, djegin e shkatërrojnë institucione dhe biznese!
PiranjatPërditësimi i fundit 14 Tetor 2026, 19:53
Tirana po përjeton orë kaosi, ndërsa protesta studentore është shoqëruar me një valë sulmesh, zjarresh dhe shkatërrimesh në disa zona të kryeqytetit.
Pas përplasjeve të forta përpara Kryeministrisë, protestuesit janë shpërndarë në grupe dhe kanë nisur të lëvizin në drejtime të ndryshme, duke goditur institucione shtetërore, biznese dhe objekte në hapësirat publike.
Situata është veçanërisht e tensionuar për shkak se incidentet nuk janë përqendruar më në një vend të vetëm. Grupe protestuesish po lëvizin nga një rrugë në tjetrën, ndërsa në disa prej zonave ku po shkaktohen dëme nuk raportohet për ndërhyrje të forcave të rendit.
Një nga sulmet më të fundit është regjistruar në Ministrinë e Drejtësisë, ku protestuesit kanë thyer xhamat në katin e parë dhe kanë ndezur zjarr në godinë.
Më herët, në Ministrinë e Ekonomisë dhe Inovacionit, demonstruesit thyen derën hyrëse, hynë në ambientet e brendshme dhe nxorën objekte, të cilave u vunë flakën. Zjarri përfshiu gjithashtu katin e parë të Ministrisë së Financave.
As Kryesia e Kuvendit nuk i ka shpëtuar sulmeve. Protestuesit kanë thyer derën e institucionit dhe kanë ndezur zjarr në hollin e godinës.
Përpara Kryeministrisë, situata u përshkallëzua me hedhje gurësh, barrikada në bulevard dhe përplasje me policinë. Një grup protestuesish depërtoi brenda rrethimit të godinës së qeverisë, ku pemët u përfshinë nga flakët dhe zjarri mori përmasa të mëdha.
Në atë zonë, policia përdori gaz lotsjellës dhe ujë me presion, por pas shpërndarjes së protestuesve në drejtime të ndryshme, sulmet ndaj godinave dhe bizneseve kanë vijuar.
Te Piramida u thyen xhamat e bizneseve në katin e parë dhe u ndezën zjarre, ndërsa flakët përfshinë edhe tabelat reklamuese.
Bizneseve u është vënë flaka edhe në katet e poshtme të kullave përballë Kryeministrisë, duke krijuar rrezik për përhapjen e zjarrit në pjesët e tjera të ndërtesave.
Në Rrugën e Durrësit, protestuesit sulmuan filialin e Iute Credit, duke dëmtuar ambientet dhe duke ndezur zjarr. Në të njëjtën zonë u dogjën kosha mbeturinash, dyshekë dhe stola të marrë nga hapësirat publike.
Ndërsa sulmet vijojnë në disa pika të kryeqytetit, mungesa e ndërhyrjes policore në vendet ku po ndodhin incidentet e fundit ngre pikëpyetje për mënyrën se si po menaxhohet situata.
Megjithëse më herët policia ndërhyri me gaz lotsjellës dhe ujë me presion, në disa nga episodet e fundit protestuesit kanë arritur të dëmtojnë godina dhe të ndezin zjarre pa u penguar në momentin e sulmeve.
Ende nuk ka një bilanc të plotë të dëmeve materiale apo të personave të lënduar gjatë incidenteve të kësaj të mërkure.
Nga ministritë te Kryesia e Kuvendit, nga Kryeministria te Piramida dhe bizneset private, sulmet janë shtrirë në disa zona të Tiranës, ndërsa situata mbetet tepër e tensionuar.
