Kryeministri Edi Rama po zhvillon një takim me drejtuesit e gjimnazeve, në një kohë kur protestat në Tiranë vijojnë prej di...
POLITIKE
Tirana nuk ka zgjedhje në nëntor, ish-kreu i KQZ: Afatet e pamundësojnë procesin
PiranjatPërditësimi i fundit 10 Tetor 2025, 16:25
Data 9 nëntor nuk është më një opsion i zgjedhjeve të pjesshme për Bashkinë e Tiranës. Eksperti dhe njohësi i zgjedhjeve, ish-kreu i KQZ, Kristaq Kume, thotë për RTSH se mbarimi i disa afateve është një ndër pengesat për mbajtjen e zgjedhjeve edhe në rast se Kushtetuesja do të dalë me vendim për shkarkimin e Erion Veliajt.
“Për mua jo vetëm që nuk është e mundur dhe as e logjikshme, por as ligjore, sepse janë të përcaktuara edhe në rastet e zgjedhjeve të tilla të pjesshme disa afate në Kodin Zgjedhor që duhen të respektohen. Nuk ka kohë fizike për të realizuar një gjë të tillë”, tha Kume.
Kume thekson se ky është rasti i parë kur Gjykata Kushtetuese kthen një dekret të Presidentit për mbajtjen e zgjedhjeve. Sipas tij, ky konflikt tregon nevojën për ndërhyrje jo vetëm në Kodin Zgjedhor, por edhe në gjithë legjislacionin.
“Kemi nevoje për të bërë ndryshime thelbësore në legjislacion, për t’iu përgjigjur ky legjislacion i ri fazës së re që ndodhemi në atë të anëtarësimit të BE. Gjithashtu për të rregulluar dhe funksionimin e mirë midis pushteteve që siç duket ka probleme. Secili pushtet ta këtë shumë mirë të shprehur cilat janë detyrat dhe përgjegjësitë e tij dhe cilat janë ndërvarësitë ndërmjet pushteteve”, tha ai.
Më datë 31 tetor, Kushtetuesja ka njoftuar se do të dëgjojë palët në seancë për të shqyrtuar padinë e kryebashkiakut Veliaj për shkarkimin e tij, Kume thotë se ende nuk është e qartë nëse pas vendimit të Kushtetueses për pezullimin e zgjedhjeve në kryeqytet, Veliaj mbetet ose jo kryebashkiak në detyrë.
“Paraprakisht duhet zgjidhur problemi ka apo nuk ka vakancë në Bashkinë e Tiranës. Deri tani nuk është thënë deri në fund një gjë e tillë dhe ndaj ka ndodhur kjo që ka ndodhur. Për bashkinë kemi vetëm vendimin e Këshillit Bashkiak që nuk krijon vakancë, por propozon ndërprerjen e mandatit dhe vakancën e krijon vendimi i qeverisë. Qeveria nuk është shprehur për këtë gjë, por i ka thënë Presidentit se duhen bërë zgjedhjet se nuk ka kryebashkiak, sepse këshilli ka marrë këtë lloj vendimi”, u shpreh Kume.
