Në ditën e nisjes së gjyqit të themelit për dosjen “Partizani”, ish-kryeministri Sali Berisha ka mohuar akuzat e ngritura...
POLITIKE
"U dorëzua për testim!" Mediat italiane: Qendrat e emigrantëve në Shqipëri janë gati, javën e ardhshme mund të hapen
M.B.Përditësimi i fundit 11 Tetor 2024, 09:08
TIRANA- Mediat italiane shkruajnë se ka përfunduar puna për përgatitjen e qendrave të emigrantëve në Lezhë. Sipas tyre, vendi i parë i pritjes në portin e Shëngjinit ishte tashmë gati prej kohësh ndërsa ai në Gjadër është dorëzuar ditën e mërkurë për testim. Sipas këtyre artikujve, pasi të kenë përfunduar testet, brenda një jave, strukturat do të hapen dhe do të mund të mirëpresin personat e parë që do t’i nënshtrohen procedurave të përshpejtuara kufitare.
"Ato mund të hapen javën e ardhshme, pas testimit. Ka përfunduar puna për qendrat e emigrantëve në Shqipëri nën juridiksionin italian . Me sa dimë, lokacioni Gjader, vendi i parë i pritjes në portin e Shëngjinit ishte tashmë gati, u dorëzua dje, 9 tetor 2024, për testim. Ekziston një qendër për ndalimin e azilkërkuesve (880 vende), një CPR (144 vende) dhe një burg (20 vende). Pasi të kenë përfunduar testet, brenda një jave, strukturat do të hapen dhe do të mund të mirëpresin personat e parë që do t'i nënshtrohen procedurave të përshpejtuara kufitare", shkruan "La7".
Në këto artikuj shkruhet se ka mure rrethuese, kamera përgjatë perimetrit, një pajisje sigurie brenda, ku zbatohet juridiksioni italian dhe forcat e policisë italiane do të garantojnë rendin. Sipas tyre, do të ketë gjithashtu staf të UNHCR-së për të monitoruar respektimin e të drejtave të refugjatëve. Kërkesat për azil do të shqyrtohen brenda 4 javësh. Janë planifikuar lidhje me videokonferencë me gjykatën e Romës për seancat e vlerësimit të paraburgimit.
Gjithashtu, mediat italiane shkruajnë se të gjithë sytë e Europës janë përqendruar te projekti, i konsideruar nga shumë njerëz si një model i vlefshëm për t’u kopjuar nga i gjithë Bashkimi Europian në përpjekje për të zgjidhur problemin e migrantëve të parregullt, për të cilin tashmë ankohen të gjitha vendet.
