"Vetëm me votate mazhorancës!" Miratohet në parim projektbuxheti 2025 në Komisionin e Ekonomisë, opozita kundër! Banka e Shqipërisë: Nevojë për rishikim të skemës së pensioneve

TIRANA- Komisioni i Ekonomisë dhe Financave ka miratuar sot në parim projektbuxhetin e vitit 2025 me votat e mazhorancës. Në këtë Komision, përfaqësuesit demokratë Jorida Tabaku e Edmond Spaho janë shprehur kundër. Tabaku tha se buxheti 2025 nuk parashikon ndryshimin e skemës së pensioneve duke kërkuar edhe seancë dëgjimore për pensionet e cila do të zhvillohet me ministrin e Ekonomisë dhe Drejtorin e ISSH. Nga ana tjetër, deputeti socialist Erion Braçe ka kërkuar në komision që të ‘shkurtohen’ fondet për mobilim zyrash dhe të financohet më shumë mbrojtja e sulmeve kibernetike.

Gjithashtu gjatë diskutimi të projektbuxhetit, Banka e Shqipërisë, me anë të zv. guvernatores Luljeta Minxhozi, ka kërkuar rishikimin e skemës së pensioneve, ndërsa kërkon që ajo të jetë në përputhje me skemat e Bashkimit Evropian. Minxhozi tha se skema aktuale mund të kthehet në një rrezik potencial për ritmin e rritjes ekonomike. Drejtori i Politikës Monetare në Bankën e Shqipërisë, Erald Themeli tha se sa i takon skemës së re të pensioneve, fillimisht duhet të analizohet informaliteti që qëndron në parametra të lartë.

Pjesë nga diskutimet në Komision:

Minxhozi: Zhvillimet aktuale kanë nxjerrë në pah nevojën e rishikimit të skemës së pensioneve. Skema e pensioneve po sfidohet fort nga ndryshimet demografike, plakja e popullsisë dhe emigrimi i krahut të punës. Mbështesim qeverinë në një skemë të re në përputhje me skemat e BE-së. Skemën e pensioneve duhet ta rishikojmë, sepse bëhet rrezik potencial për ritmin e rritjes ekonomike.

Tabaku: Sot skemës së pensioneve i mungon kontributi i 40% të forcës aktive për punë, për shkak të emigracionit. Ndërkohë buxheti 2025 nuk parashikon fond shtesë që ti adresohet skemës së pensioneve. Ndërkohë kontributet shoqërore që kontribuojnë në skemën e pensioneve janë rritur me 60% si efekt i rritjes së pagës minimale, ndërkohë që rritja që rritja që mund të vijë nga formalizimi mund të jetë maksimalisht 10-15 milionë euro, jo më shumë, duke e vendosur në retorikë politike skemën e pensioneve.

Themeli: Ka një shkallë të lartë informaliteti sa i takon deklarimit të pagave. Në gjykimin tonë përpara se të eksplorohen parametrat e reja të sistemit të pensioneve do të ishte e udhës të kuptoheshin drejt përmasat e këtij informaliteti, në mënyrë që të mos devijojnë parametrat e skemës së re. Jemi nga të paktat vende që në momentin që qeveria rrit pagën minimale, ne na rritet edhe numri i punonjësve, sepse bizneset kanë shumë punonjës me paga të larta dhe nuk i raportojnë.

Braçe: Merr një prioritet mbrojtja kibernetike. Do doja që të alokoheshin burime për mbrojtjen nga sulmet kibernetike dhe veçanërisht në 3 institucione Agjencisë Kombëtare të Sigurisë, në Shërbimin Informativ të Shtetit dhe AKSH.

komisioni i ekonomise