Pasuri me vlerë 77 milionë lekë janë vendosur nën sekuestro preventive në kuadër të hetimit të SPAK për traf...
POLITIKE
Vrasja e 14-vjeçarit/ "Drejtoria e shkollës dhe policia ka pasur informacion për ngjarjen", Noka-Spiropalit: Askush nuk ka dashur t’ia dijë, ju i bëni gjërat për show!
n.fPërditësimi i fundit 19 Nëntor 2024, 13:42
Noka
TIRANË- Sekretari i Përgjithshëm i PD-së, Flamur Noka ka mbajtur fjalën e tij në Kuvend gjatë seancës së sotme ndërsa ka insistuar që të mbahet një minutë heshtje në lidhje me vrasjen e 14-vjeçarit, Martin Cani. Noka u shpreh se ngjarja është tragjike ndërsa thekosi se 24 orë më përpara në atë shkollë keni mbajtur leksion për sigurinë.
Ai shtoi se drejtoria e shkollës dhe punonjësit e policisë që mbulojnë zonën kanë pasur informacion dhe askush nuk ka dashur t’ia dijë. Sipas tij mazhoranca i bën gjërat për show. Noka tha se nuk ka turp më të madh që deputetët të kërkojnë një minutë heshtje për vrasjen e një fëmije dhe mazhoranca rri ulur. Noka u shpreh se ata rrinë mbi kufomat e njerëzve dhe mbi gjakun e njerëzve në pushtet.
Këtu ka 24 orë që në të gjithë mediat pasqyrohet vrasja e një 14-vjeçari. Ka 24 orë që i gjithë opinioni publik është i shokuar. Dhe ju të gjithë që jeni atje, duke filluar të gjithë ministrat, që nga ky hajduti i bashkisë e duke përfunduar deri tek ajo që kishte burrin bandit dhe therte njerëzit, heshtni a thua se nuk ka ndodhur gjë në këtë vend. Tani zonjë, kërkoi kolegu një minutë heshtje.
Është tragjike zonjë, sepse 24 orë më përpara në atë shkollë keni mbajtur leksion për sigurinë. E gjithë drejtoria e shkollës ka pasur informacion për ngjarjen. Edhe punonjësit e policisë që mbulojnë zonën kanë pasur informacion dhe askush nuk ka dashur t’ia dijë, sepse ju i bëni gjërat për show. Mbrëmë në mesnatë u vra një i ri, i biri i një gjyqtari që ka dhënë dënime me burgime të përjetshme për krimin. I biri i një gjyqtari që ka dënuar dhjetëra kriminale dhe që ju, drejtësia juaj, e flaku në rrugë vetëm se nuk ishte lëpirës i juaji dhe i bandës që ju keni çuar në krye të drejtësisë.
Dhe këtu sikur nuk ndodh asgjë. Pse ndodhin këto? Sepse drejtori i përgjithshëm i policisë është ushtar i krimit. Keni çuar drejtor të policisë së Tiranës një ushtar të krimit të organizuar. Prandaj krimi bën kërdinë. Nuk ka turp më të madh zonjë se deputetët të kërkojnë një minutë heshtje për vrasjen e një fëmije dhe ju këtu të rrini ulur. Ju rrini mbi kufomat e njerëzve. Ju rrini mbi gjakun e njerëzve në pushtet. Kjo është fytyra juaj.
