Në fund të vitit 2025, numri i mjeteve rrugore të regjistruara (me status aktiv ose të çregjistruara përkohësisht) arriti n...
POLITIKE
Zgjedhjet e 11 Majit në pikëpyetje – PD-ASHM kërkon anulimin e rezultatit: "Procesi i kapur nga krimi dhe administrata!
PiranjatPërditësimi i fundit 1 Shtator 2025, 15:25
Partia Demokratike ka depozituar zyrtarisht një padi në Kolegj Zgjedhor, duke kërkuar rrëzimin e Vendimit nr. 34, datë 28.08.2025, të Komisionit Rregullator pranë KQZ-së. Në kërkesën e bërë publike, koalicioni kërkon që të mos shpallet rezultati përfundimtar i zgjedhjeve parlamentare të mbajtura më 11 maj 2025.
Në shkresë PD, thekson se procesi zgjedhor nuk ka qenë në përputhje me Kushtetutën, ku për rrjedhojë edhe qytetarët ndihen të zhgënjyer.
"Duke qenë se këto shkelje janë të dokumentuara dhe të konfirmuara nga raportet e organizatave monitoruese ndërkombëtare si OSBE-ODIHR, si dhe nga praktikat e mbledhura gjatë procesit, është i qartë fakti që rezultati i shpallur nga Komisioni Shtetëror i Zgjedhjeve më 11 maj 2025 është i pavlefshëm dhe nuk mund të pranohet si i tillë. Për më tepër, Komisioni Shtetëror i Zgjedhjeve, i drejtuar nga Ilirjan Celibashi, nuk mori asnjë masë për të parandaluar apo adresuar këto problematika.
Vetëm një vendim i drejtë dhe i guximshëm i Kolegjit Zgjedhor do të shërbente si garanci për mbrojtjen e parimeve demokratike, respektimin e vullnetit qytetar dhe vendosjen e një precedenti të nevojshëm për të ardhmen e proceseve zgjedhore në Shqipëri. Ndaj, për të gjitha këto arsye, dhe duke marrë në konsideratë se provat dhe argumentet e paraqitura janë të plota dhe të pakundërshtueshme, kërkojmë që: Në seancën e gjykimit përpara Kolegjit, të kërkohet përfundimisht nga Kolegji Zgjedhor pranimi i plotë i kësaj padie sipas objektit të saj, duke vendosur: Ndryshimin e Vendimit nr. 34, datë 28.08.2025 të Komisionit Rregullator pranë KOZ, duke vendosur rrëzimin e propozimit të Komisionerit Shtetëror të Zgjedhjeve (KSHZ) për shpalljen e rezultatit përfundimtar të Zgjedhjeve për Kuvend të datës 11 maj 2025", thuhet në padinë e PD.
Pas 107 ditësh nga zgjedhjet parlamentare të enjte, KQZ i vendosi vulën procesit të 11 majit. Komisioni Rregullator, certifikoi zgjedhjet që shpallën Edi Ramën fitues të 83 mandateve.
Në mbledhje, dy përfaqësuesit e PD-së, Muharrem Ccakaj dhe Helga Vukaj votuan kundër, duke mbajtur të njëjtin qëndrim si forca që përfaqësojnë që e cilëson procesin një farsë zgjedhore.
Çakaj tha se Komisioneri Shtetëror ka ndjekur dy standarde të ndryshme kur ishte rasti i Zegjine Çaushit që u fut në Kuvend dhe kandidatëve të koalicionit Nisma Shqipëria Bëhet. Ndërkohë anëtarja tjetër e propozuar nga opozita, Helga Vukaj hodhi akuza të fortë për përfaqësuesit e PS-së, në Komisionin Rregullator, të cilët sipas saj i kanë kërcënuar për të votuar siç ata kanë dashur.
