Zgjedhjet parlamentare/ KQZ certifikon "Lëvizjen Bashkë" si të parin subjekt më 11 Maj

Lëvizja Bashkë

TIRANË - Komisioni Qëndror i Zgjedhjeve ka certifikuar "Lëvizjen Bashkë" si të parin subjekt në zgjedhjet parlamentare të 11 Majit. 

Në një postim në rrjete sociale Lëvizja Bashkë thotë se kjo është sipas tyre një dëshmi e seriozitetit dhe integritetit me të cilin kjo parti i qaset politikës. 

Ndër të tjera në reagim thuhet se kandidatët për deputet të kësaj force politike janë njerëz që kanë kontribuar për të mirën publike dhe të gatshëm të ndryshojnë politikën nga brenda. 

Postimi:

Sot, Komisioni Qendror i Zgjedhjeve certifikoi zyrtarisht Lëvizjen BASHKË si subjektin e parë të regjistruar për zgjedhjet parlamentare të 11 majit. Ky nuk është thjesht një hap teknik, por një dëshmi e seriozitetit dhe integritetit me të cilin Lëvizja BASHKË i qaset politikës.

Në një skenë politike ku pazaret dhe llogaritë e minutës së fundit janë normë, ne dorëzuam listat 6 ditë përpara afatit, duke treguar se nuk bëhemi pjesë e lojërave të errëta të pushtetit. Qindra aktivistë e përkrahës nga Tirana, Fieri, Durrësi, Elbasani, Shkodra, Korça, Kukësi e deri në Sarandë, me 5.500 firma të mbledhura rrugë më rrugë, na dërguan krenarisht në këtë garë si një forcë e re, e majtë, demokratike dhe e pakompromis në politikën shqiptare.

Kandidatët tanë janë qytetarë të ndershëm dhe profesionistë nga të gjitha shtresat e shoqërisë, duke përfaqësuar një politikë që bazohet në meritë dhe jo në klientelizëm. Redi Muçi (Tiranë), inxhinier dhe pedagog; Mirela Ruko (Fier), sociologe dhe aktiviste për të drejtat e punëtorëve; Artan Kacani (Durrës), arkitekt-urbanist; Oltion Fociro (Elbasan), pedagog dhe ekspert në informatikë; Gabriel Rakaj (Shkodër), inxhinier fizike dhe kërkues shkencor; Ilir Zoto (Vlorë), avokat dhe mbrojtës i të drejtave të qytetarëve; Petro Lubonja (Korçë), profesionist në turizëm dhe aktivist i diasporës; Elio Shyti (Berat), zhvillues softuerësh dhe një nga figurat kryesore të nismës “Dua të Votoj 2025”; Alban Metallari (Kukës), inxhinier dhe kërkues shkencor ndërkombëtar; Emiljando Kita (Lezhë), politolog dhe aktivist; Besjan Kica (Dibër), fermer dhe specialist në mbrojtjen e bimëve; Klevis Bedaj (Gjirokastër), specialist IT dhe njohës i industrisë së turizmit.

Ata janë më shumë se emra në një liste — janë njerëz që kanë kontribuar realisht për të mirën publike, të gatshëm të ndryshojnë politikën nga brenda. Në një vend ku politika ka humbur çdo kredibilitet, mbështetja e qindra aktivistëve dhe mijëra qytetarëve që dhanë firmën, zërin dhe fytyrën e tyre për ne, është dëshmi e një ndryshimi të pashmangshëm. Faleminderit të gjithë atyre që kontribuan në këtë rrugëtim! Ne zotohemi se nuk do ta tradhtojmë kurrë besimin tuaj! Më 11 maj, ndryshimi bëhet realitet!

levizja bashke zgjedhje 11 maj

arlind qori levizja bashke