Zgjedhjet parlamentare të 11 Majit/ Partitë angazhohen për etikë në fushatat dixhitale

Foto ilustruese

TIRANË - Angazhimi i marrë nëpërmjet këtij kodi parashikon një fushatë me reklama që nuk cenojnë integritetin apo përhapin informacione të pavërteta për kundërshtarin politik dhe çdo grup të shoqërisë, si dhe një fushatë transparente me sponsorizime dhe financime të deklaruara, etj..

Kodi u firmos nga dy partitë e mëdha që dominojnë fushatën elektorale, Partia Socialiste dhe Partia Demokratike dhe parti të vogla e të reja që janë regjistruar në këto zgjedhje si, Partia e Lirisë, Partia Mundësia, Nisma Thurje, Lëvizja Bashkë, Shqipëria Bëhet.

Komisioneri Shtetëror i Zgjedhjeve Ilirian Celibashi vlerësoi angazhimin e partive politike për vetrregullim dhe kërkoi që dokumenti të mos mbetet vetëm formal, por të zbatohet dhe të nxisë një sjellje të përshtatshme të liderëve të politikës për një garë elektorale të drejtë dhe të ndershme.

“Ne nuk mund të bëhemi hipokritë të mos pranojmë realitetin”- tha ai duke shtuar se “duke qenë një angazhim vullnetar ajo që mund të bëjë KQZ është sjellja në vëmendje e këtij dokumenti”.

Toni Gogu nga PS-ja tha se kodi përputhej me vlerat e familjes së tij politike, ndërsa Albana Vokshi nga PD-ja u shpreh skeptike për zbatimin e tij nga socialistët dhe e quajti dokumentin si të pamjaftueshëm për të garantuar zbatimin e parimeve etike në praktikë.

“PS ka përdorur administratën për të bërë ‘like’ dhe ‘share’”- tha ajo duke kërkuar nga KQZ që të merrte masa në rast të shkeljes së kodit.

Edhe përfaqësuesit e partive të vogla shprehën rezerva për zbatimin e këtij kodi duke sjellë në vëmendje thyerjen e parimeve dhe standardeve që parashikohen në të nga partitë e mëdha politike.

Pranimi i rregullave të etikës në fushatën online erdhi pas një konsultimi të gjërë mes partive dhe shoqërisë civile me nxitjen e Instituti Ndërkombëtar për Demokraci dhe Asistencë Zgjedhore (International IDEA), Instituti Demokratik Amerikan (NDI) dhe Qendra për Sundimin e Ligjit pranë Universitetit të Helsinkit.

Në mënyrë vullnetare partitë nënshkruese zotohen që në zgjedhjet parlamentare të vitit 2025 të ruajnë integritetin e zgjedhjeve duke zbatuar rregulla dhe parime për fushatë të ndershme dhe transparencë financiare.

Po ashtu pranojnë se do të bëjnë një fushatë që nxit diskurs politik gjithëpërfshirës duke mos prodhuar apo shpërndarë deklarata me paragjykime diskriminuese ndaj grupeve të caktuara për shkak të gjinisë, origjinës racore ose etnike, fesë, besimit, aftësisë së kufizuar, moshës ose orientimit seksual.

Partitë angazhohen të mos nxisin dhunë, të mos shpërndarjen informacione të pasakta në lidhje me procesin zgjedhor, të mos prodhojnë e shpërndajnë përmbajtje keqinformuese duke përdorur Inteligjencën Artificiale, llogari të rreme apo bot-e automatike për të manipuluar opinionet e zgjedhësve, etj..

Angazhimet parashikojnë edhe transparencë politike ku përfshihet mospërdorimi i reklamave politike të sponsorizuara nga interesa të padeklaruara dhe mosangazhimi i palëve të treta ndërmjetëse për dhënie mesazhesh për fushatë ku nuk identifikohet burimi ose sponsorizuesi i mesazhit.

Partnerët nxitës të këtij kodi etike vlerësojnë se Komisioni Qendror i Zgjedhjeve ka rol vendimtar në monitorimin e reklamave politike, duke përfshirë edhe reklamat online, në kuadrin e garantimit të integritetit të zgjedhjeve./BIRN

parti politike zgjedhje parlamentare 11 maj etike ne fushata dixhitale