Zjarri në zonën e Radostinës në Fier vijon të jetë aktiv me intensitet të lartë dhe situata raportohet e vështir&...
SOCIALE
Autoriteti i Mbikëqyrjes Financiare: Rritja e kredisë për shtëpi “mban gjallë” tregun e sigurimit të jetës
M.B.Përditësimi i fundit 15 Tetor 2024, 07:56
TIRANA- Zgjerimi i vazhdueshëm i kredisë për blerjen e banesave po shtyn në rritje tregun e sigurimit të jetës edhe gjatë këtij viti. Sipas të dhënave nga Autoriteti i Mbikëqyrjes Financiare (AMF), për 8- mujorin 2024, kompanitë e sigurimit të jetës lidhën pothuajse 75 mijë kontrata të sigurimit të jetës së debitorit. Numri i kontratave të sigurimit për këtë produkt është rritur me 13.4% krahasuar me të njëjtën periudhë të një viti më parë.
Për tetë muajt e vitit 2024, primet e shkruara bruto nga kontratat e sigurimit të jetës së debitorit arritën në 1.04 miliardë lekë ose më shumë se 10 milionë euro. Krahasuar me të njëjtën periudhë të vitit të kaluar, primet e shkruara bruto janë rritur me 21.5%. Sigurimi i jetës së debitorit është në fakt kolona kryesore ku mbahet tregu i sigurimit të jetës në Shqipëri. Aktualisht, ai siguron rreth 77% të numrit të përgjithshëm të kontratave dhe afërsisht 79% të volumit total të primeve të shkruara bruto.
Produkti i jetës së debitorit është i lidhur pothuajse tërësisht me ecurinë e kredisë bankare. Shumica e bankave kërkojnë sigurim jete për kontratat e kredisë bankare afatgjata dhe në shuma të mëdha. Zakonisht, këto kontrata sigurimi kërkohen në kreditë me qëllim blerjen e pasurive të paluajtshme. Megjithatë, ka disa banka apo institucione financiare që mund të kërkojnë sigurim jete edhe për kreditë konsumatore. Sigurimi i jetës rinovohet çdo vit, për të gjithë kohëzgjatjen e kredisë.
Në këtë mënyrë, rritja e kontratave të sigurimit të jetës së debitorit është në mënyrë të tërthortë edhe i financimeve të bankave për kredi hipotekare dhe i nivelit të kërkesës në tregun e pasurive të paluajtshme. Sipas të dhënave nga Banka e Shqipërisë, portofoli i kredisë për blerjen e pasurive të paluajtshme nga individët në fund të muajit korrik arriti në 199.6 miliardë lekë, ose afërsisht dy miliardë euro. Në një vit, ky portofol është rritur me 13.5%. Kredia për banesa po shfaq ende një ecuri pozitive, pavarësisht rritjes së normave të interesit prej vitit të kaluar.
Për 8-mujorin 2024, tregu i sigurimit të jetës arriti një volum të primeve të shkruara bruto prej 1.33 miliardë lekësh, në rritje me 9% krahasuar me të njëjtën periudhë të një viti më parë. Rritja e tregut të jetës është pak më e më e lartë se rritja e sigurimeve të jo-jetës, që për të njëjtën periudhë shënoi një rritje me rreth 6.5%. Rritja e tregut të sigurimit të jetës ka ardhur pothuajse e gjitha nga produkti i sigurimit të jetës së debitorit, ndërsa produktet e tjera paraqiten në rënie./ Monitor
