Një protestues i pranishëm para Ministrisë së Arsimit ka ironizuar efektivët e policisë për sjelljen e tyre gjatë protes...
SOCIALE
Virozat e stinës, mjekja ngre alarmin: Ka infeksione të cilat po prekin shumë organe, mos i nënvlerësoni simptomat
PiranjatPërditësimi i fundit 1 Tetor 2025, 14:51
Virozat e stinës po qarkullojnë masivisht dhe kanë filluar të prekin disa organe jetike në trup, duke kaluar nga simptomat e lehta drejt komplikacioneve serioze. Alarmin e ka dhënë mjekja infeksioniste Najada Çomo, e cila gjatë një interviste televizive ka apeluar për më shumë kujdes dhe për t’u konsultuar me mjekun në rast të çdo shqetësimi shëndetësor, sado i vogël të duket.
Sipas Çomos, situata aktuale paraqitet me një valë infeksionesh të shumëllojshme që ndikojnë në organe të ndryshme si truri, mushkëritë, zemra, traktin tretës, veshët dhe lëkurën. Ajo thekson se shpeshherë, simptomat fillestare si temperatura, dhimbja e kokës, diarreja apo dhimbja e veshit, keqinterpretohen si një “virozë e zakonshme”, ndërkohë që në shumë raste pas tyre fshihen probleme të thella që kërkojnë trajtim të specializuar.
“Në situatën aktuale ka shumë infeksione, të cilat prekin shumë organe, duke filluar nga truri, i pari në listën e komplikacioneve të rënda. Preken gjithashtu mushkëritë, bajamet, zemra, lëkura, pjesa e syve, veshët, sinuset dhe trakti i tretjes. Janë shenja që shoqërohen me temperaturë të lartë, të vjella, dhimbje stomaku apo diarre”, u shpreh mjekja Çomo.
Ajo paralajmëron se pas simptomave që duken të lehta, mund të fshihet një patologji e vështirë për t’u menaxhuar edhe nga vetë personeli mjekësor. Për këtë arsye, apelon për kujdes dhe për të mos u bazuar vetëm në trajtime popullore apo vetëmjekim.
“Pirja e një çaji apo e një bari është normale, por jo gjithmonë mjafton. Ka një kufi që mund të vetëmjekohesh, por nëse ka diçka që nuk e kupton vetë, atëherë duhet të vlerësohet nga mjeku. Mos neglizhoni asnjë ankesë shëndetësore”, tha Çomo.
Ajo i bëri thirrje qytetarëve që të jenë më të vëmendshëm ndaj shëndetit të tyre dhe të mos e anashkalojnë vizitën tek mjeku nëse simptomat zgjasin ose përkeqësohen.
