Elisa Spiropali ka reaguar pas zgjedhjeve në Serbi, ku Lista e Studentëve fitoi përballë Alexandar Vuçiç.
Deputetja sociali...
SPORT
“Final 4” iluzion për Partizanin? Tani duhen golat dhe një fitore e thellë ndaj Dinamos
PiranjatPërditësimi i fundit 5 Maj 2026, 09:19
Partizani u mposht në një mënyrë turpëruese me rezultatin 1-4 nga Flamurtari në “Arenën e Demave”, duke komplikuar edhe më tepër objektivin e këtij sezoni për t’u kualifikuar në “Final 4”.
Disfata në shtëpi erdhi në një moment delikat të kampionatit, aty ku çdo pikë ka peshë të jashtëzakonshme dhe ku çdo hap fals mund të rezultojë vendimtar në garën për katërshen e parë. Kjo humbje jo vetëm që dëmtoi moralin e skuadrës, por ndikoi drejtpërdrejt edhe në renditje, duke e vështirësuar ndjeshëm rrugën drejt objektivit sezonal.
Kombinuar edhe me fitoren e Dinamos ndaj Egnatias, “Demat” e shohin veten tashmë tre pikë larg bluve, që mbajnë vendin e katërt me 48 pikë. Diferenca nuk është e pakapërcyeshme në letër, por duke parë momentin që po kalon skuadra dhe ecurinë e rivalëve, situata bëhet dukshëm më e komplikuar. Partizani duhet të reagojë menjëherë në dy javët e mbetura, nëse dëshiron të mbajë gjallë shpresat për një vend në “Final 4”.
NDESHJET E MBETURA- Kalendari nuk është aspak i lehtë për të kuqtë, të cilët në ndeshjen e radhës do të përballen me Egnatian, që do të kërkojë reagimin me trajnerin e ri Nevil Dede, ndërsa në javën e fundit, të kuqtë i pret pikërisht dueli direkt ndaj Dinamos. Kjo e fundit mund të shndërrohet në një “finale” të vërtetë për vendin e katërt, por vetëm nëse Partizani arrin të mbajë hapin deri në atë moment dhe të mos humbasë terren në ndeshjen paraardhëse. Megjithatë, situata ndërlikohet edhe më shumë për shkak të bilancit të ndeshjeve direkte. Edhe nëse Partizani dhe Dinamo e mbyllin kampionatin me pikë të barabarta, kjo nuk do të ishte e mjaftueshme për të kuqtë. Aktualisht, blutë udhëheqin përballjet direkte, pasi kanë regjistruar dy fitore dhe vetëm një humbje ndaj Partizanit gjatë këtij sezoni.
PROBLEMI- Për këtë arsye, skenari që i jep avantazh Partizanit është më i vështirë për t’u realizuar. Nëse të dyja skuadrat përfundojnë me pikë të barabarta, atëherë “Demat” do të duhet të fitojnë me të paktën tre gola diferencë në përballjen direkte ndaj Dinamos, në mënyrë që të përmbysin bilancin dhe të marrin vendin e katërt. Një objektiv i tillë kërkon jo vetëm rezultat, por edhe një dominim të plotë në një ndeshje që pritet të jetë shumë e luftuar. Duke parë diferencat minimale mes skuadrave dhe nivelin e barabartë të kampionatit, ky skenar duket mjaft i vështirë për t’u arritur. Dinamo, nga ana tjetër, do të jetë maksimalisht e motivuar për të ruajtur pozicionin e saj dhe për të siguruar pjesëmarrjen në “Final 4”, çka e bën edhe më të komplikuar misionin e Partizanit. Në këto kushte, alternativa më realiste për të kuqtë është që të shpresojnë në një hap fals të Dinamos në ndeshjen ndaj Vorës. Një rezultat negativ i bluve do t’i hapte rrugë Partizanit për të rikuperuar diferencën, me kusht që vetë skuadra e “Demave” të bëjë detyrën dhe të marrë maksimumin e pikëve në ndeshjen ndaj Egnatias. Vetëm në këtë mënyrë, skenari i një “finaleje” direkte në javën e fundit ndaj Dinamos në “Arenën e Demave” do të merrte kuptim të plotë. Një ndeshje e tillë do të vendoste gjithçka dhe do t’i jepte Partizanit mundësinë për të vendosur fatin në fushë, pa u varur nga rezultatet e të tjerëve.
MOMENTI NEGATIV-Megjithatë, përpara se të mendojë për llogaritë dhe skenarët, Partizani duhet të reflektojë mbi paraqitjen ndaj Flamurtarit. Një humbje 1-4 në shtëpi është një sinjal i fortë alarmi, që tregon se skuadra ka probleme jo vetëm në aspektin taktik, por edhe në atë psikologjik. Nëse “Demat” nuk arrijnë të reagojnë menjëherë dhe të ndryshojnë qasje në dy ndeshjet e fundit, atëherë rrezikojnë që një sezon me shumë ulje-ngritje të mbyllet në mënyrën më zhgënjyese të mundshme, jashtë objektivit minimal të vendosur që në fillim: pjesëmarrja në “Final 4”.
