Astrit Idrizi, 35-vjeçari i arrestuar për zjarrin në banesat sociale në Shkozë ku humbën jetën dy të moshuar, dyshoh...
SPORT
Gerard Piqué synon stolin e trajnerit, legjenda e Barçës gati për një aventurë të re
PiranjatPërditësimi i fundit 14 Tetor 2026, 12:43
Gerard Piqué nuk ka ndërmend të qëndrojë larg futbollit tradicional. Pas karrierës së suksesshme si mbrojtës i Barcelonës dhe përfaqësueses spanjolle, ish-futbollisti ka nisur të përgatitet për një sfidë të re: të bëhet trajner dhe të drejtojë një skuadër në nivelet më të larta të futbollit.
Piqué, i cili pas tërheqjes nga futbolli profesionist u bë një nga figurat kryesore pas projektit të “Kings League”, po ndjek aktualisht një kurs trajnerësh të organizuar nga Federata e Futbollit të Andorrës. Sipas mediave spanjolle, përfshirë AS, programi pritet të përfundojë në qershor të vitit 2027.
Ish-mbrojtësi, kampion bote me Spanjën në vitin 2010 dhe fitues i shumë trofeve me Barcelonën, synon të pajiset me kualifikimet e nevojshme për të nisur një karrierë të re në pankinë. Kursi përfshin disa module që mundësojnë ushtrimin e profesionit në kampionatin e Andorrës dhe në kompeticione të tjera ku njihet licenca përkatëse.
Interesi i Piqués për këtë rol lidhet edhe me përfshirjen e tij në drejtimin e FC Andorra, klub të cilin e ka blerë përmes projektit të tij sportiv. Përvoja në administrimin e klubit mund t'i shërbejë si një tjetër hap drejt kuptimit të futbollit nga një këndvështrim i ri.
Piqué nuk është i vetëm, edhe legjenda të tjera në kursin e trajnerëve
Në këtë program janë regjistruar edhe disa emra të tjerë të njohur të futbollit europian dhe botëror. Mes tyre janë Sergio Busquets, Carles Puyol, Thiago Alcántara, Santi Cazorla, Andrés Guardado dhe Javi Martínez.
Të gjithë kanë pasur karriera të rëndësishme si futbollistë dhe tani po përgatiten për të ardhmen, me synimin për të mbetur pjesë aktive e këtij sporti edhe pas përfundimit të karrierës në fushë.
Për Piquén, kalimi nga fusha e lojës në pankinë do të ishte një tjetër sfidë pas eksperiencave në biznesin sportiv dhe krijimit të një formati të ri futbolli përmes “Kings League”. Mbetet për t'u parë nëse ish-mbrojtësi do të arrijë të ndërtojë një karrierë si trajner po aq të suksesshme sa ajo që pati me fanellën e Barcelonës dhe të Spanjës.
