Partia e djathtë gjermane Alternativa për Gjermaninë (AfD) ka kërkuar deportimin e më shumë se një milion refugjatëve,...
SPORT
Rrezikon volejbollin për testin e gjinisë, reagon ekipi Dinamos për Ferreiran
PiranjatPërditësimi i fundit 28 Tetor 2025, 21:14
Ngjarja e zhurmshme në volejbollin shqiptar ka të vetmen protagoniste dhe të dëmtuar, volejbollisten e Dinamos, Nayara Ferreira, e cila po përballet me presionin e opinionit përveç pezullimit sportiv. Prej disa ditësh, Ferreira nuk është paraqitur në stërvitje, duke qëndruar e mbyllur dhe në një gjendje të rënduar psikologjike. Klubi, pavarësisht angazhimeve, vazhdon të merret edhe me gjendjen e saj duke i qëndruar pranë.
Trajneri i Dinamos, Orlando Koja, rrëfen tentativat për ta rikthyer në stërvitje: “Një lojtare e rëndësishme edhe nga ana e komunikimit na dëmtoi për momentin, por vajzat e tjera morën një shtysë për të treguar forcën e tyre. Po mundohem ta rikthej, por ajo më tha që nuk ndjehet gati për stërvitje.”
Megjithatë, stërvitjet e ekipit vazhdojnë me ritmet normale. Kapitenia Elena Bego thotë se gjendja e grupit ka ndryshuar emocionalisht, por ata vazhdojnë të mbajnë lidhje me sportisten:
“Gjendja e saj emocionale është shumë e ngarkuar, por komunikojmë çdo ditë dhe shpresoj që situata të përmirësohet.”
Trajneri Koja paralajmëron se mund të jetë e pamundur rikthimi i Ferreirës në ekip: “Ajo po rri këtu për të na thënë se është 100% femër dhe pastaj largohet.”
Pas intervistës së saj në Top Channel, ku akuzoi Federatën e Volejbollit për diskriminim, institucioni i sportit reagoi përmes një komunikate, duke theksuar pritjen për analizën e kërkuar për verifikimin e gjinisë dhe garantimin e transparencës, duke shmangur shkeljen e të drejtave individuale.
Në nivel ndërkombëtar, mediat braziliane si “Melhor do Voley” vënë në dukje se dënimi ndaj Ferreirës është i mbushur me paragjykime dhe transfobi, edhe pse ajo është një grua cisgjinore. Lojtarja ka marrë gjithashtu mbështetje në rrjetet sociale nga kolege të saj.
