Një numër gjithnjë e në rritje punonjësish në Gjermani e ndryshojnë vendin e punës brenda një viti. Janë kry...
SPORT
Trajneri debuton me fitore, Lushnja sheh “dritë” ndaj Korabit. Bano: Ndeshje e vështirë, kemi shumë për të bërë
PiranjatPërditësimi i fundit 19 Janar 2026, 14:44
Lushnja më në fund sheh dritë në fund të tunelit, teksa duket se dora e trajnerit të ri, Artan Bano, ka nisur të ndihet në skuadër. Tekniku 59-vjeçarit i kanë mjaftuar vetëm dy javë përgatitore në krye të verdhejeshilëve për të debutuar me fitore. Të shtunën, në kuadër të javës së 18-të të kampionatit, Lushnja mposhti Korabin me shifrat 2-0 në stadiumin “Roza Haxhiu”.
Më në fund, lushnjarët panë të konkretizohej edhe reparti ofensiv, me golat që u shënuan në minutat shtesë të të dy pjesëve. Fillimisht ishte kapiteni Canka që zhbllokoi rezultatin, ndërsa në fundin e takimit realizoi Jurgen Peqini, i sapoardhuri nga merkatoja e dimrit. Një fitore me zemër, shpirt dhe karakter, që jep sinjale të qarta ndryshimi dhe shprese për sigurimin sa më shpejt të mbijetesës në Kategorinë e Parë.
Ndeshja- Të dyja ekipet erdhën në këtë përballje me mungesa të rëndësishme, si Meta te Lushnja dhe golashënuesi Marku te Korabi. Takimi nisi i kujdesshëm nga të dyja palët, me fokus fillimisht shmangien e humbjes, për të kaluar më pas te kërkimi i fitores, veçanërisht për vendasit. Lushnjarët u shfaqën më kërkues dhe më të vendosur, duke luftuar për çdo top dhe duke treguar dëshirë të madhe për ta fituar ndeshjen. Pavarësisht rasteve të krijuara, rezultati u zhbllokua vetëm në minutën e dytë shtesë të pjesës së parë, kur Canka shënoi një gol të bukur me kokë pas një goditjeje nga këndi, duke i dhënë topit një trajektore që vuri në vështirësi portierin mik.
Me shifrat 1-0 u mbyll pjesa e parë. Edhe pjesa e dytë vijoi në të njëjtën linjë, megjithëse terreni i rënduar u bë pengesë në disa momente për zhvillimin e lojës. Në këtë fraksion, të dy trajnerët kryen rifreskimet e nevojshme, duke hedhur në fushë edhe përforcimet e merkatos së dimrit. Goli i dytë i lushnjarëve erdhi pas një aksioni të shpejtë të lojtarëve të futur nga stoli. Në minutën e parë shtesë të takimit, pas një kundërsulmi të rrufeshëm, Zaganjori shërbeu një asist të saktë për Peqinin, i cili nuk e pati të vështirë të dyfishonte shifrat dhe të vuloste fitoren 2-0. Me këtë trepikësh, Lushnja ngjitet në kuotën e 19 pikëve, duke u renditur në vendin e 10-të, por tashmë vetëm një pikë larg Korabit që mban pozicionin e nëntë, duke e bërë edhe më interesante garën për mbijetesë.
Korabi: Mehidri, Kurti, Uallac, Xhika, Sina (Lajthia 60’), Mziu, Laho (Ndreu 71’), Kuka (H.Reçi 79’), Spahiu(Cahani 60’), Morina, Zeqiraj(Lilaj 79’). (në dispozicion: Haka, Tepshi, Duka, Goga, E.Reçi). Trajner: Alfred Deliallisi
Kartonë të verdhë:Uesli 84/Laho 45+2,trajneri Deliallisi 45+2,Cahani 71,Ndreu 73
Gjyqtarë: O.Ferataj (Patos), E.Ganxhi Elbasan), M. Llukmani (Vlorë)
Bano: Ndeshje e vështirë, kemi shumë për të bërë
“Efekti Bano” dha rezultat që në 90 minutëshin e parë, teksa Lushnja arriti të mposhtë Korabin në ndeshjen e debutimit të trajnerit të ri. Pas triumfit të parë në krye të verdhejeshilëve, Artan Bano u shfaq i kënaqur, por njëkohësisht realist, duke theksuar se skuadra ka ende shumë punë për të bërë. “Ndeshja e parë ishte shumë e vështirë, duke ditur që u përballëm me një ekip si Korabi, i organizuar shumë mirë dhe me goxha cilësi brenda. Kampionati është shumë i fortë dhe çdo ndeshje është e luftuar, sidomos duke pasur parasysh mangësitë që kemi pasur në pjesën e parë të sezonit”, u shpreh Bano. Tekniku lushnjar theksoi se fitorja do të shijohet vetëm për pak kohë, pasi fokusi është te vazhdimësia. “Do të gëzojmë sot dhe nga nesër do të nisim menjëherë punën për ndeshjet e ardhshme.
Këto dy javë kemi punuar mirë me futbollistët, por edhe pse fituam, kemi ende shumë për të përmirësuar, si në fazën sulmuese ashtu edhe në atë mbrojtëse”, vijoi ai. Sipas Banos, progresi duhet të jetë i vazhdueshëm. “Do të rritemi çdo ditë, çdo javë. Nëse arrijmë të përmirësohemi edhe me 5%, mendoj se do t’ia dalim me sukses deri në fund të sezonit. Ky është një kampionat shumë i vështirë dhe cilësor, me fusha të vështira, që shpesh ta diktojnë lojën. Edhe në këtë takim, terreni ndikoi në 2-3 episode që mund ta kishim mbyllur më herët ndeshjen”, theksoi trajneri. Në fund, Bano u ndal edhe te ndryshimi më i madh që ka vënë re te skuadra. “Kemi kaluar vetëm një ndeshje me sukses dhe kemi shumë punë për të bërë. Ajo që ka ndryshuar më shumë është harmonia në dhomat e zhveshjes. Të gjithë janë bashkë, vijnë një orë më herët, punojmë për detajet, për problemet taktike dhe për gjithçka që i takon një skuadre futbolli”, përfundoi Bano.
