Në ceremoninë përkujtimore të 80-vjetorit të Kryengritjes së Postribës, deputeti i PD-së, Bardh Spahia, vlerësoi ...
AKTUALITET
1 kilogram heroinë nga RMV-ja drejt Shqipërisë, arrestohen dy persona
PiranjatPërditësimi i fundit 11 Qershor 2026, 13:08
Dy persona janë arrestuar nga Policia e Elbasanit në kuadër të operacionit të koduar “Trajektorja”, pas zbulimit të një sasie prej 1 kilogrami heroinë që dyshohet se ishte trafikuar nga Maqedonia e Veriut drejt Shqipërisë.
Sipas policisë, në pranga ranë L. G., 32 vjeç, banues në Strugë, dhe A. B., 45 vjeç, banues në Durrës. Hetimet kanë zbuluar se 32-vjeçari dyshohet se kishte siguruar dhe transportuar lëndën narkotike nga Maqedonia e Veriut, duke e futur në territorin shqiptar përmes kufirit të gjelbër, ndërsa 45-vjeçari e priste atë në Shqipëri me qëllim shitjen.
Arrestimi i tyre u bë në aksin rrugor Bulqizë-Librazhd, ku efektivët ndaluan automjetin tip “Fiat” me të cilin po udhëtonin. Gjatë kontrollit të imtësishëm, policia gjeti një çantë shpine të fshehur në gomën e pasme të furgonit, ku ndodhej 1 kilogram heroinë.
Në cilësinë e provës materiale u sekuestruan lënda narkotike, automjeti, dy telefona celularë, si dhe 40 mijë lekë, 50 euro dhe 290 denarë.
Materialet procedurale i janë referuar Prokurorisë së Elbasanit, ndërsa hetimet vijojnë për dokumentimin e plotë të aktivitetit kriminal dhe identifikimin e personave të tjerë të përfshirë në këtë rast.
