Gjykata Penale e Tiranës pritet të marrë në shqyrtim gjatë ditës së sotme 28 masa që lidhen me protestën e zhvill...
AKTUALITET
Avokati Uljan Bajrami vihet në pranga, Llangozi: Një akt po aq i rëndë sa vrasja e gjyqtarit Kalaja, tronditëse
PiranjatPërditësimi i fundit 19 Tetor 2025, 12:28
Pas arrestimit të avokatit Uljan Bajrami, i cili u ndalua nga policia për kërcënim të prokurorit gjatë një seance gjyqësore, ka reaguar edhe avokati Arben Llangozi. Përmes një postimi në Facebook, Llangozi ka cilësuar këtë arrestim si "të padrejtë" dhe ka theksuar se Bajrami po "pagon çmimin e ndershmërisë" në një sistem të kalbur dhe të korruptuar.
Llangozi e ka cilësuar ngjarjen si një nga "më tronditësit" që ka goditur drejtësinë shqiptare në vitet e fundit, duke e krahasuar atë me ngjarje të tilla tronditëse si vrasja e gjyqtarit Astrit Kalaja. Ai ka theksuar se njëri u vra fizikisht, ndërsa Bajrami po "vritet" për së gjalli nga një sistem që, sipas tij, nuk duron zërin e ndershëm dhe kritik ndaj manipulimeve të mundshme.
Postimi i avokat Arben Llangozi
Uljan Barjami, Avokati që po paguan çmimin e ndershmërisë në një sistem të kalbur .Arrestimi i avokatit Uljan Barjami është një nga ngjarjet më tronditëse që ka goditur drejtësinë shqiptare në vitet e fundit. Është po aq i rëndë sa vrasja e gjyqtarit Astrit Kalaja, sepse në të dy rastet është goditur në zemër vetë drejtësia. Njëri u vra fizikisht, tjetri po “vritet” për së gjalli nga një sistem që nuk duron dot zërin e ndershëm dhe kritik ndaj manipulimit.
Ajo që po ndodh me Uljanin është pasqyra më e qartë e një realiteti të frikshëm, kur ligji përdoret si armë kundër atyre që e mbrojnë, atëherë shteti ka dështuar. Oficerë, prokurorë dhe gjyqtarë që bashkëpunojnë për të manipuluar prova, që krijojnë akuza të rreme dhe mbulojnë të vërtetën, janë shndërruar në një zinxhir të njëjtë korrupsioni. Ata nuk kërkojnë drejtësi, por pushtet. Nuk mbrojnë ligjin, por interesat e errëta që i komandojnë dhe veprimet e tyre kriminale.
Uljani nuk është një avokat i zakonshëm. Ai është një simbol i kurajos profesionale dhe njerëzore, një zë që flet aty ku të tjerët heshtin. Ai është hero i punës, i ndershmërisë dhe i përkushtimit ndaj ligjit, një shembull i gjallë i asaj çfarë duhet të jetë avokatia, mburojë për të pafuqishmit, jo armë e pushtetit.
Sot, ai ndodhet përballë një sistemi që përpiqet ta shkatërrojë vetëm pse nuk pranoi të bëhet pjesë e lojës së pistë. Por rasti i tij nuk është vetëm i tij, është kauza e gjithë shoqërisë që kërkon transparencë, llogaridhënie dhe drejtësi të vërtetë. Nëse heshtim sot për Uljanin, nesër do të jetë dikush tjetër në vendin e tij.
Prandaj është koha të reagojmë. Të mos pranojmë më drejtësi të manipuluar, prokurorë që bëjnë pazare dhe gjyqtarë që marrin urdhra. Uljani është prova se ende ka njerëz që besojnë tek ligji, tek e vërteta dhe tek ndershmëria dhe për këtë arsye është i rrezikshëm për ata që ndërtojnë karrierën mbi mashtrimin.
Uljan Barjami nuk duhet të lihet vetëm. Kauza e tij është kauza e dinjitetit njerëzor, e besimit tek drejtësia dhe e shpresës se Shqipëria mund të ketë ende njerëz që nuk shiten.
