Një tjetër tentativë e negociatorëve për të bindur 35-vjeçarin të dorëzohet është zhvilluar pak minut...
AKTUALITET
Bllokimi i TikTok, Gjykata Kushtetuese mbyll shqyrtimin
PiranjatPërditësimi i fundit 23 Shkurt 2026, 20:21
Në seancën përmbyllëse, pala ankimuese e përfaqësuar nga shoqata “Asociacioni i Gazetarëve të Shqipërisë” dhe “Rrjeti Ballkanik për Gazetarinë Investigative, Shqipëri”, në argumentet përfundimtare e konsideroi vendimin si anti-kushtetues.
Sipas organizatave, vendimi i Këshillit të Ministrave kishte ndikuar mbi lirinë e shprehjes dhe shtypit, të drejtën e informimit, lirinë ekonomike dhe garancitë përkatëse të përcaktuara në Kushtetutë.
Nga ana e tij, Këshilli i Ministrave u mbrojt para gjykatës me pretendimin se vendimi kishte qenë i ndikuar nga interesi publik dhe kishte pasur si synim mbrojtjen e të drejtave të fëmijëve.
Edhe pse Këshilli i Ministrave e shfuqizoi vendimin e saj për bllokimin e TikTok-ut në fillim të shkurtit, Gjykata Kushtetuese vijoi me shqyrtimin e çështjes në themel.
Qeveria vendosi në 6 mars 2025, për mbylljen e platformës për shkak të efektit të pretenduar negativ mbi shëndetin psiko-emocional të fëmijëve. Vendimi u pasua me një kërkesë të Autoritetit të Komunikimeve Postare Elektronike (AKEP) për kompanitë që ofrojnë shërbimeve interneti në vend që të bllokojnë qasjen ne aplikacionin e Tik Tok në Shqipëri.
Organizatat për mbrojtjen e lirisë së shprehjes në vend dhe ato ndërkombëtare janë shprehur kritike ndaj vendimit të qeverisë, duke e parë si precedent të rrezikshëm për lirinë e shprehjes dhe vendosjen e censurës, duke e çuar çështjen për shqyrtim në Gjykatën Kushtetuese.
