DENONCIMI/ Plagosja e djeshme në kryeqytet mund të ishte parandaluar, policia ishte njoftuar për rastin para nisjes së konfliktit dhe nuk veproi

foto ilustruese

TIRANË- Dy persona kanë përfunduar mbrëmjen e djeshme në spital, pas një konflikti mes dy personave në rrugën "Ndre Mjeda" në kryeqytet. Në njoftimin e djeshëm të policisë, thuhej se dy personat mbetën të plagosur pas një konflikti ku u përdorën sende të forta dhe thikë. 

"Më datë 09.01.2025, rreth orës 21:05, në rrugën Ndre Mjeda, gjatë një konflikti për motive të dobëta shtetasi B.D, rreth 69 vjeç, ka goditur me sende të forta shtetasin B.M, rreth 45 vjeç, ndërsa ky i fundit ka goditur me një mjet prerës shtetasin B.D. Të dy këta shtetas ndodhen në spital, nën kujdesin e mjekëve. Shërbimet e Policisë dhe Grupi Hetimor ndodhen në vendngjarje dhe po punojnë për zbardhjen e plotë e rrethanave të ngjarjes.", thuhej konkretisht në njoftimin e policisë. 

Por si qëndron e vërteta e konfliktit dhe a mund të ishte parandaluar plagosja e dy personave? 

Në një denoncim të ardhur në Dosja.al thuhet se ishte 69-vjeçari, i cili quhej Bashkim i cili ka lajmëruar policinë se 45-vjeçari ishte në gjendje të dehur dhe se po e ngacmonte. 

Pas lajmërimit të tij, në denoncim thuhet se efektivët e policisë kanë mbërritur në vendin e ngjarjes, dhe duke mos ushtruar të paktën edhe një kontroll fizik 45-vjeçarit të dehur, i kanë thënë Bashkimit se nuk mund t'i bëjnë asgjë personit tjetër përveçse ta këshillojnë. 

Pasi është larguar policia, 45-vjeçari e ka goditur me thikë Bashkimin, i cili përfundoi në spital nën kujdes mjekësore. Ngjarja mund të ishte parandaluar dhe plagosja me thikë mund të ishte shmangur, për shkak se policia ishte njoftuar për rastin dhe nuk ka ndërmarrë asnjë veprim ndaj agresorit. 

plagosje ne tirane